Адкуль пайшлі «шкляніцы Ядзвігі»
Адным з шэраговых старажытнарускіх гарадоў называлі Наваградак савецкія гісторыкі, не ўлічваючы тыя ашаламляльныя знаходкі, што імі ж былі адкапаныя на замчышчы. Між тым знакамітую «шкляніцу Ядзвігі» — сведку роўнасці Наваградка еўрапейскім сталіцам — колішняя ленінградскія навуковая эліта не прамінула звезці ў калекцыю Эрмітажа. І ніхто не збіраецца яе вяртаць.
|
Наваградскі замак. XIII ст. |
Менавіта ён даймаў у 1970-х недарэчнымі пытаннямі наконт
значнасці Наваградка «зорку» савецкай археалогіі Фрыду Гурэвіч: «Чаму ж тады на
адным гектары тутэйшай зямлі вы раскапалі столькі еўрапейскіх каштоўнасцяў,
колькі не набярэцца ва ўсіх гарадах Панямоння разам? Адкуль узяўся тут храм
XIII стагоддзя? Як горад, што месціцца ў 25 км ад ракі, выбіўся ў сталіцу ВКЛ —
па тых часах гэта ж было зусім не тыповай з'явай? І чаму, нарэшце, менавіта тут
каранавалі Міндоўга?». Падзвіжніца археалагічнай справы Фрыда Гурэвіч, якая на
той час «капалася» ўжо ў наваградскай зямлі дваццаць гадоў, разгубілася і
схавала свае думкі за бляклай фармулёўкай: «Усё гэта можна патлумачыць іначай».
Вось так, без удакладненняў.
Хутчэй за ўсё, яе таксама мучылі сумненні, але паддацца
спакусе аднавіць гістарычную праўду азначала б для заложніцы афіцыйнай
канцэпцыі перакрэсліць адной фразай усе свае навуковыя здабыткі. Свядома не
выпіналі да часу і шыкоўную знаходку, зробленую калегай Фрыды Гурэвіч —
ленінградскім археолагам Малеўскай. Яна раскапала на замчышчы самую старажытную
на тэрыторыі Беларусі грамадзянскую пабудову з цэглы і каменю, якую цяпер
прынята лічыць рэзідэнцыяй вялікага князя.
Затое каменя на камені не пакінуў тады на афіцыйным міфе пра
тое, што крыважэрныя літоўскія князі паглынулі Наваградак, настаўнік беларускай
мовы па дыпломе і ўніклівы гісторык на справе Мікола Ермаловіч. У надрукаваным
на пішучай машынцы вялікім стосе папер, які нелегальна хадзіў па руках
тагачаснай беларускай інтэлігенцыі, Ермаловіч цалкам лагічна даводзіў, што ў
40-х гадах XIII ст. для Наваградскага княства склаліся складаныя ўмовы. І
наваградцы самі пачалі шукаць дапамогі ў Еўропе. Выкананне складанай палітычнай
місіі было даручана князю Міндоўгу.
— Міндоўга на княства, безумоўна, запрасілі, бо Наваградак быў
багатым горадам. І небяспека для яго на той час была вялікая, — упэўнены і
гісторык Алесь Краўцэвіч, які днямі выдаў першую кнігу з серыі «Жыццяпіс
Вялікіх князёў Літоўскіх», дзе падае гісторыю вялікай дзяржавы праз асобы,
распачаўшы, зразумела, з Міндоўга.
У хроніках і летапісах не называецца месца, дзе адбыўся ў
ліпені 1253 года ўрачысты акт каранацыі Міндоўга. Алесь Краўцэвіч лічыць, што
яна адбывалася ў наваградскай Барыса-Глебскай царкве. У іншых крыніцах ёсць
згадкі пра тое, што дзеля ўрачыстасці падрыхтавалі залу ў самім замку.
У 1960 годзе падчас раскопак вакольнага горада старажытнага
Наваградка ленінградскія археолагі знайшлі часткі шклянога кубка, аздобленага
рэльефнаю разьбою і гравіроўкай, а таксама аплаўленыя ў агні кавалачкі другой
такой жа шкляніцы. Падобны посуд на абшарах краіны нідзе больш не сустракаўся,
затое быў вядомы ў Англіі, Галандыі, Польшчы, Нямеччыне. Такія кубкі навукоўцы
называюць “шкляніцы Ядзвігі”. Паводле легенды, жонка сілезскага князя Генрыха
Барадатага Ядзвіга ўчыніла цуд, ператварыўшы ваду, налітую ў падобны кубак, у
віно.
У Брытанскім музеі захоўваецца разбёная шкляніца з Цюрынгіі.
Паводле памераў яна вельмі падобная да наваградскай. Ці магла выпадкова трапіць
у Наваградак “шкляніца Ядзвігі”?
Што ж да Наваградскага замка, то ў ХVІ ст. ён меў 7
вежаў і быў адным з магутнейшых у
Беларусі. Але ж войскі Карла XII настолькі пашкодзілі замак, што аднавіць яго
ўжо было немагчыма. А ў 1802 годзе гарадзенскі губернатар Бенігсан даў дазвол
наваградскаму гараднічаму Скалону разабраць рэшткі замкавых веж з умовай, што
каменнем з іх вымасцяць вуліцы горада. У 1828 г. у данясенні
Літоўска-Гарадзенскаму губернскаму праўленню паведамлялася, што ў Наваградскім
старажытным замку яшчэ ёсць «две башни довольно... крепкие, немного вверху
поврежденные, состоящие в ведомстве Новогрудской экономии». Дзякуй табе,
гультаяваты Скалон, што не давёў справу да канца!
Оцените статью
1 2 3 4 5Читайте еще
Избранное