У Магілёве зьнік кіраўнік міліцэйскай паліклінікі

Служба грамадзкіх сувязяў УУС Магілёўскага аблвыканкаму пракамэнтуе сытуацыю «празь некалькі дзён», паведамляе Радыё Свабода.

Начальнік медычнай службы ДФіТ МУС па Магілёўскай вобласьці Сяргей Максімаў, 2017 год

Пра зьнікненьне кіраўніка магілёўскага аддзяленьня мэдычнай службы дэпартамэнту фінансаў і тылу МУС Сяргея Максімава позна ўвечары паведамілi ў тэлеграме.

«Уся мэдычная грамадзкасьць Магілёва гудзе з прычыны зьнікненьня высокапастаўленага начальніка, — гаворыцца ў паведамленьні. — Каля тыдня таму кіраўнік мэдычнай службы дэпартамэнту фінансаў і тылу МУС РБ Максімаў Сяргей Уладзіміравіч ня выйшаў на працу. У кабінэце выявілі рапарт аб звальненьні, ключы ад кабінэту і пасьведчаньне. Мяркуецца, што Максімаў вылецеў у ЗША ці Ізраіль празь Вільню. З сайту зьнікла інфармацыя пра яго. Захавалася ў кэшы Гугла».

У рэгістратуры паліклінікі магілёўскага аддзяленьня мэдслужбы дэпартамэнту фінансаў і тылу МУС сытуацыю са зьнікненьнем Максімава камэнтаваць адмовіліся, параіўшы зьвязацца з яго прымальняй. Тэлефоны прымальні раніцой 12 сакавіка не адказвалі.

Свабода зьвярнулася па камэнтар у службу грамадзкіх сувязяў УУС Магілёўскага аблвыканкаму. Там сытуацыю са зьнікненьнем Максімава таксама ня сталі камэнтаваць, аднак паведамілі, што афіцыйная інфармацыя аб гэтым зьявіцца ў бліжэйшыя дні.

​Сяргей Максімаў нарадзіўся ў Магілёве ў 1970 годзе, мае тры вышэйшыя адукацыі — скончыў Менскі мэдычны інстытут (зараз унівэрсытэт), Акадэмію кіраваньня і Мэдычную акадэмію пасьлядыплёмнай адукацыі. Да таго як узначаліць мэдслужбу дэпартамэнту фінансаў і тылу МУС у Магілёве, кіраваў мясцовай паліклінікай КДБ, таксама працаваў галоўным лекарам Быхаўскай раённай больніцы.

Мэдычная служба дэпартамэнту фінансаў і тылу — структурнае падразьдзяленьне МУС. У падначаленай ёй магілёўскай паліклініцы абслугоўваюць пераважна дзейных міліцыянтаў і вэтэранаў ведамства.

18 лютага летась Сяргей Максімаў быў абраны дэпутатам гарсавету ад Арлоўскай выбарчай акругі №11.