Коршунаў: «Расія стала не самым лепшым сябрам. Больш пазітыўнае стаўленне, як гэта не парадаксальна, да Кітая»

– З большага ніякіх звышнатуральных вынікаў мы не пабачылі. Хаця, напэўна, і можна было б чакаць дынамікі, праз тое, што ўплыў вайны ва Украіне захоўваецца. Але тут трэба разумець, што дадзеныя збіраліся ў жніўні, калі людзі ўжо прызвычаіліся да вайны, – адзначае сацыёлаг Генадзь Коршунаў.

То бок, калі па вясне вайна яшчэ была тым, што ўзрушыла ўсіх і парвала старыя шаблоны мыслення, то праз паўгода людзі прызвычаіліся і гэта стала нібыта нормай. Гэта з аднаго боку.

З іншага боку, трэба разумець, што масавая свядомасць і грамадская думка – гэта феномены, якія вельмі павольныя і вельмі інерцыйныя. Каб штосьці там змянілася, патрэбныя нейкія выбуховыя рэчы.

І, – працягвае эксперт, – менавіта наступная хваля даследавання Chatham House, якая адбудзецца пасля, дай Бог, добрых навін з украінска-расійскага фронту, нам больш яўна пакажа нейкую дынаміку.

Сацыёлаг заўважае, што найбольш вялікія лічбы, якія мы пабачылі ў гэтым даследаванні – гэта паляпшэнне агульнага стаўлення да краін Еўропы.

– Прычым там бачна, што па некаторых краінах зрухі пачаліся яшчэ ў красавіку, а па некаторых летам. І гэта павелічэнне добрага стаўлення ў сярэднім каля 10%.

Да таго ж, я думаю, што гэтыя адсоткі будуць расці, таму што беларусы назіраюць, як паводзіць сябе Еўропа адносна Украіны. Мне ўзгадваюцца 2014-2015 гады пасля таго, як Захад не вельмі падтрымаў Украіну ў пытанні з Крымам. Тады з боку беларусаў быў невялічкі, але ўсплёск еўраскептыцызму.

А зараз я прагназую, што паколькі Захад паказаў, што будзе падтрымліваць Украіну, і ён робіць гэта паслядоўна і мэтанакіравана, то і стаўленне да Еўропы і да пэўных краін будзе паляпшацца. Зразумела, калі беларусы будуць бачыць, што Захад – гэта не бяззубая старая Еўропа, якая нічога не можа супрацьпаставіць Расіі, а гэта моцны саюз, які дае ёй адпор у тым ліку і ў ваенным плане хай нават і пры дапамозе Украіны.

Коршунаў звяртае ўвагу на яшчэ адну цікавостку новага даследавання:

– Даволі цікавы факт, на які чамусьці ніхто не звярнуў увагі – гэта тое, што стаўленне да Расіі не самае лепшае сярод замежных краін. Больш пазітыўнае стаўленне, як гэта не парадаксальна, да Кітая, з якім у шараговага беларуса ніякіх трывалых асацыяцый, хутчэй за ўсё, няма.

Гэта, з аднаго боку, кажа пры ўплыў прапаганды. А, з іншага боку, я магу выказаць гіпотэзу, што і стаўленне да Расіі таксама крыху па-прапагандысцку надзьмутае.

Бо, шчыра кажучы, я не памятаю, ці было такое ў даследаваннях, калі беларусы называлі Расію не самым лепшым сябрам, і яна была на другім месцы. Вось гэта вельмі цікавы феномен.