Кныровіч: «Я ўпэўнены, што дзеці Лукашэнкі не будуць жыць у краіне Беларусь»

— Я ўпэўнены, што нікуды Лукашэнка не збіраецца, — пракаментаваў Аляксандр Кныровіч у эфіры Еўрарадыё размовы пра магчымы сыход правіцеля ў рэчышчы прыняцця новага закону аб гарантыях. — Пра гэта магчыма меркаваць звонку, калі вы не ведаеце становішча у Беларусі і хто такі Лукашэнка. Калі мы гаворым пра звычайнага аўтарытарнага прэзідэнта, то, так, у нас ёсць прыклады, калі яны сыходзяць, з’язджаюць кудысьці, каб памерці.

Аднак, упэўнены аналітык, гэта не выпадак Лукашэнкі.

— Я цалкам ўпэўнены, што нікуды Лукашэнка не сыдзе і будзе адначасова кіраваць і ВНС і сядзець на пасадзе прэзідэнта, пакуль яго не вынесуць з Драздоў, — лічыць Кныровіч.

Сам закон — гэта рэха абяцанняў, якія правіцель даваў ў 2020 годзе пасля размовы з Пуціным.

— І я ўпэўнены, што дзеці Лукашэнкі не будуць жыць у краіне Беларусь. Яны будуць жыць дзесьці ў Дубаі, у  Эміратах, якія дора адносяцца да тых людзей, якія скралі шмат грошай і хочуць спакойна дажыць. Навошта ім гэтыя рызыкі?

Кныровіч у якасці прыкладу адсутнасці гарантый прывёў кіраўнікоў іншых краін.

— Паглядзіце, як прыцягваюць да адказнасці Трампа, як прыцягваюць да адказнасці былога прэзідэнта Францыі Сарказі, які атрымаў тры гады і адзін год павінен быў адседзець дома. Як прыцягнулі да адказнасці вялікага карупцыянера Берлусконі. Прэзідэнта Бразіліі. У нармальнай краіне прэзідэнт — гэта нармальны чалавек, і таму Лукашэнка баіцца.

Ён не можа не быць прэзідэнтам і не сесці за краты. За тыя забойствы, якія адбыліся ў Беларусі. Яго дзеці — гэта карупцыянеры, якія атрымалі шмат грошай за тое, што яны дзеці Лукашэнкі.

Канешне, гэты ўказ не спасе ні яго, ні яго дзяцей. Ніхто не будзе глядзець на гэты ўказ, якія прапісаў сам Лукашэнка, аб чым яго не прасіў ніхто, — заключае Аляксандр Кныровіч.