Адлічылі за шалік
З Беларускага дзяржаўнага педагагічнага унівесітэта імя М.Танка выключылі яшчэ аднаго актывіста студэнцкага руху. Да адлічаных 14 сакавіка Людмілы Асіпенкі і Аляксандра Карцеля сёння далучыўся першакурснік гістарычнага факультэта Рыгор Шкурынаў. Паводле афіцыйнай фармулёўкі, усе студэнты былі выключаны “за сістэматычнае парушэнне дысцыпліны і правілаў унутранага распарадку”.
— Мне нічога не патлумачылі, проста сказалі, што я адлічаны,
— распавёў “Салідарнасці” Рыгор Шкурынаў.—Думаю, што ўся справа ў маёй актыўнай
грамадскай пазіцыі, якой я ніколі не ўтойваў. Да таго ж я заўсёды размаўляю
па-беларуску.
Як расказаў Рыгор Шкурынаў, літаральна за некалькі дзён да
адлічэння, 14 сакавіка, яго разам з двума аднагрупнікамі затрымалі супрацоўнікі
міліцыі.
— Яны ўбачылі ў мяне на шыі бел-чырвона-белы шалік і
загадалі паказаць, што ў нас у заплечніках, — кажа хлопец. — У мяне знайшлі
налепкі “За свабоду!”, у хлопцаў не знайшлі нічога. Аднак усё роўна затрымалі і
на ўсіх завялі адміністратыўную справу. Вядома, паведамілі ва універсітэт. І
вось сёння даведаўся, што адлічаны. Збіраліся адлічыць і маіх аднагрупнікаў,
хаця яны ўвогуле проста ішлі па вуліцы побач са мной.
Адметна, што ўсе адлічаныя студэнты вучыліся ва універсітэце
толькі на “выдатна” і “добра”. “Салідарнасць” паспрабавала даведацца пра
сапраўдныя прычыны адлічэння Рыгора Шкурынава, аднак застаць намесніка дэкана
гістарычнага факультэта Аляксандра Радзькова на месцы сёння не атрымалася.
Затое дэкан факультэта беларускай філалогіі і культуры, адкуль была адлічана
студэнтка 4 курса Людміла Асіпенка, аказаўся больш дасягальным. Праўда, даць
каментар наконт таго, якім чынам ягоная студэнтка “парушала дысцыпліну і
правілы ўнутранага распарадку”, Аляксандр Лугоўскі адмовіўся.
— Я не абавязаны адказваць на гэтае пытанне. А то
тэлефануюць тут увесь час, пагражаюць, — адказаў ён карэспандэнту
“Салідарнасці”. — За пропуск заняткаў адлічана, і усё! Колькі прапусціла? На
гэта я таксама адказваць не буду.
Тым не менш, па словах самой Людмілы Асіпенка, пропуск
заняткаў не мог стаць сапраўднай прычынай яе адлічэння.
— Яшчэ пачынаючы з летняй сесіі, мяне рэгулярна выклікалі ў
дэканат і прамывалі мазгі наконт маёй грамадскай дзейнасці. Да таго ж
кіраўніцтва ўпэўнена, што я маю дачыненне да самвыдатаўскай газеты “Танкісты”,
якая досыць рэзка крытыкуе палітыку універсітэта. Што датычыць вучобы, дык з
боку выкладчыкаў да мяне ніколі не было прэтэнзіяў, а ад кіраўніцтва я ніколі
не атрымлівала ніякіх вымоў. Толькі нядаўна нечакана для сябе даведалася, што
мне вынесена вымова за пропуск на працягу ўсяго семестра 12 пар. Гэта пры тым,
што ў некаторых студэнтаў з майго курса было толькі за месяц па 60 гадзін! Пра
сапраўдныя прычыны адлічэння магу толькі здагадвацца.
Людміла Асіпенка ўжо накіравала ліст на імя рэктара
універсітэта з просьбай азнаёміць з матэрыяламі адносна яе адлічэння. Разам з
выключаным з 4 курса рускай філалогіі Аляксандрам Карцелем яна таксама падала
заяву ў Міністэрства адукацыі.
Паводле некаторых звестак, студэнты педагагічнага
універсітэта сёння збіраюцца правесці акцыю ў падтрымку адлічаных сяброў.
Оцените статью
1 2 3 4 5Читайте еще
Избранное