Журналіст Пачобут ужо рыхтуецца да суду
Следчыя органы прынялі рашэнне падоўжыць расследаванне па справе гарадзенскага журналіста Анджэя Пачобута яшчэ на месяц, да 21 лістапада.
Журналіст польскай Gazety Wyborczej, які абвінавачваецца ў паклёпе на прэзідэнта, успрыняў навіну спакойна і лічыць, што справа даўно гатовая для перадачы ў суд.
– Сітуацыя з чарговым працягам расследвання па маёй справе, як і сам факт узбуджэння гэтай крымінальнай справы, абумоўлены, на маю думку, выключна палітычнымі мэтамі ўладаў, – лічыцць Анджэй Пачобут. – У мяне няма ілюзій наконт нейкіх дапрацовак. Проста сітуацыя пакуль чакае свайго развіцця. Працэсуальна там усё даўно падрыхтавана. Яшчэ калі мне прад’явілі абвінавачанне, я азнаёміўся з матэрыяламі і заключэннямі экспертызы. Усе матэрыялы былі гатовыя для перадачы справы ў суд.
Журналісту цяжка прадказваць магчымае развіцце падзей па яго справе.
– Ведаеце, калі гэта датычыць цябе, трохі цяжка аналізаваць і загадваць, – іранізуе суразмоўца «Салідарнасці». – Лепей спытаць тых, хто замовіў гэту справу.
Анджэй Пачобут працуе ў звыклым рэжыме.
– Я працую так як працаваў, – кажа журналіст. – З прафесінага пункту гледжання мне трохі цяжка знаходзіцца пад падпіскай аб невыездзе, бо я не магу пакінуць Гродна, дзеля якога-небудзь рэпартажу. Але Гродна я вельмі люблю. Гэта вялікі горад і мне для камфортнага адчування дастаткова яго прасторы, – падсумаваў Анджэй Пачобут.
Нагадаем, што журналіст Gazety Wyborczej паўторна абвінівачваецца ў паклёпе на Аляксандра Лукашэнку на падставе артыкулаў, змешчатых на «Хартыі» і «Беларускім партызане». Анджэя Пачобута арыштавалі ў чэрвені, але пасля выпусцілі пад падпіску аб нявыездзе. Журналіст не прызнае сябе вінаватым, і нават адмовіўся даваць тлумачэнні следству.
Оцените статью
1 2 3 4 5Читайте еще
Избранное