Як жыхары вёскі Стараград пісалі Уга Чавэсу

Жыхары вёскі Стараград Кармянскага раёну скардзяцца на жыцьцё Лукашэнку і Чавэсу — заробкі нізкія, камунальныя дом гадамі не рамантуюць, дах цячэ, а кіраўніцтва на патрабаваньне Лукашэнкі стварае «ўзорную фэрму».

Шасьцікватэрны жылы дом № 2а па вуліцы Савецкай у вёсцы Стараград нагадвае хутчэй нейкую ламарню, чым чалавечае жытло. Не на шмат лепшыя й суседнія панэльныя дамы, але гэты асаблівы. Плоскі дах цячэ, паравое ацяпленьне даўно адключана — са сьцен тырчаць трубы-дымаходы. Людзі пабудавалі стаякі, каб неяк абагравацца ад холаду. Але ад вадзяных плыняў, сырасьці, плесені, пачарнелай столі яны пазбавіцца ня могуць.

Жыхарка дома спадарыня Натальля: «Дах цячэ, усё вакол плыве. Сьцены мокрыя — паклеіць шпалерамі немагчыма. Дзіркі, шчыліны наўкола».

Натальля працуе на збожжатоку ў філіяле АТ «Карма-Аграсэрвіс», да якога далучылі мясцовы саўгас. У яе двое дзяцей, трэцім цяжарная. Як гадаваць у такіх умовах немаўля, не прыдумае:

«Давядзецца ў гэтых умовах гадаваць. А дзе яшчэ? Жыльля нармальнага няма. Я на збожжатоку працую. Расцэнак ня ведаем — за што працуем? Мы мільён ня можам зарабіць. Такі эканаміст у нас — зрэзаў поўнасьцю расцэнкі. Калі ж ня будзеш працаваць, жыльлё могуць адабраць. Якое яно ні ёсьць — і яго могуць адабраць. А за мільён я ня ведаю, як дзяцей апранаць, карміць».

Муж Натальлі Дзьмітры да нядаўняга часу таксама працаваў у філіяле «Карма-Аграсэрвіс» электрагазазваршчыкам, але звольніўся па прычыне немагчымасьці зарабіць. Плацілі той жа мільён ці крыху больш, калі працаваў без выходных.

Дзьмітры: «Заробак мне не дазваляў нават нейкі рамонт зрабіць. У 21-м стагодзьдзі я ня бачыў, каб у шматкватэрным двухпавярховым жылым стаялі грубкі. Зімою — сажа, дым. Гэта немагчыма. Вада ідзе ржавая, тэхнічная — яна непрыдатная для спажываньня. Яна іржавая. Каму ні кажаш — усё бяз сэнсу».

Нядаўна вяскоўцы пра свае праблемы напісалі нават Аляксандру Лукашэнку — і пра жытло, і пра заробкі. У ліпені былі падрыхтавалі ліст на імя старшыні ФПБ Леаніда Козіка й прэзыдэнта Вэнэсуэлы Уга Чавэса. Маўляў, Беларусь будуе вэнэсуэльцам аграгарадкі ды розныя іншыя аб’екты, а вы — дапамажыце беларусам.

Ліст вяскоўкі, аднак, не адправілі. Мясцовае начальства абяцала ўлагодзіць сытуацыю. Нібыта нават і дах абавязаліся пачаць рамантаваць у кастрычніку, бо зараз моцна занятыя стварэньнем ў гаспадарцы «ўзорнай фэрмы» — як таго патрабаваў кіраўнік дзяржавы.

Фэрма ў вёсцы Стараград

Вяскоўка Вольга кажа на гэта: «Рамантаваць пачалі хлеў, а за дамкі не бяруцца. Фэрму рамантуюць, а за наш жылы дом нават не бяруцца. А мы як можам, так і жывем».

Зараз зноў пачасьціліся дажджы, і маладая жанчына нават у кватэры на першым паверсе баіцца дакрануцца да сьцяны:

«Сьцены б’юцца электратокам. Не мяне, а майго брата аднойчы токам сьцяна стукнула. Цяпер, калі дождж, баімся нават да сьцяны дакрануцца. Па сьцяне цячэ і цячэ. У дождж у гасьціннай я сьвятло не ўключаю. Я аднойчы ўключыла, дык лямпачка — пух! — іскры паляцелі. Вада бяжыць па праводцы проста на лямпачку».

Не палепшылася сытуацыя і з аплатай працы.

Даярка Кацярына: «Заробак нізкі — што тут скажаш. Два мільёны не выходзіць. Як жа мы кепска працуем? Працуем-та, як і ўсе. Даглядчыку жывёлы „бруднымі“ налічылі 3 мільёны 300 тысяч, а даярцы „бруднымі“ — 2. Яшчэ вылічаць, і я атрымаю прыкладна паўтара мільёны. Вось як мне пражыць і сям’ю пракарміць?»

Адзін з начальнікаў філіялу распавёў, што вытворчасьць малака сёлета павялічылася. І прывагі жывёлы нібыта ёсьць. Толькі жывёлаводы істотнай прыбаўкі да заробку не адчуваюць.

Цялятніца: «Кепскі заробак. Большае пагалоўе перадасі, але менш атрымаеш. Я ў траўні атрымала паўтара мільёны, у чэрвені — мільён 100 тысяч. Перадала 27 цялят на дарошчваньне, а мне не аплацілі. Як кажуць, прапусьцілі міма вушэй. Кожны месяц абяцаюць: наша віна, даплацім, зробім, падымем, але нічога не падымаецца і не аплачваецца».

Оцените статью

1 2 3 4 5

Средний балл 0(0)

Читайте еще

Дневник войны, глава 39. «Украинец украинцу всегда подставит плечо. Даже если это плечо ранено»

Конвейер репрессий. Задержан бывший администратор дворового чата Александр Захожий. Правозащитница Татьяна Ласица на свободе (дополняется)

Конвейер репрессий. За участие в маршах задержали 19-летнюю олимпиадницу. Сотрудника Академии наук отправили на «сутки». Лукашенко — об амнистии: «Никакого торга не будет»

Кнырович: «Сложно представить, что россиянин сможет спрятаться в более-менее приличном месте в Могилеве, Бресте или Минске»

Конвейер репрессий. Силовики задержали учителя частной минской школы и пастора. «Хапун» на Гродненщине. Правозащитницу Насту Лойко опять отправили на 15 суток. Госпропаганда набросилась на Onliner

Беларус з Кембрыджа: «Не бачу нічога, што мне перашкодзіць стаць міністрам у новай Беларусі»