У Зэльве могуць знесці помнік Ларысе Геніюш

Помнік паэтцы Ларысе Геніюш, які быў усталяваны 20 год таму на тэрыторыі царквы Святой Жываначальнай Тройцы, можа быць знесены. З такім заклікам звярнулася да адміністрацыі раённага і абласнога цэнтру праўладная актывістка Вольга Бондарава — і ўжо атрымала згоду ад чыноўнікаў у Зэльве і Гродне.

Са зносам помніка пагадзіліся кіраўнік упраўлення па ідэалагічнай рабоце і справах моладзі Гродзенскага аблвыканкама Ігар Булаўка і намеснік старшыні Зэльвенскага райвыканкама па ідэалагічнай рабоце Галіна Раманчук.

Аднак, як зазначае Hr*dna.life, паколькі помнік быў пастаўлены пры бласлаўленні царквы, патрэбна атрымаць дазвол яшчэ і ад БПЦ. Увосень мінулага года Бондарава накіравала зварот на імя Мітрапаліта Мінскага і Заслаўскага Веніяміна з просьбай даць згоду на ліквідацыю помніка. Таксама яна звярнулася ў адміністрацыю Лукашэнкі, каб там пасадзейнічалі ў зносе «без прыцягнення непатрэбнай увагі грамадскасці», і да генпракурора — каб той пакараў адказных за ўсталяванне помніка.

Паводле праўладнай актывісткі, сама наяўнасць помніка парушае закон «Аб недапушчэнні рэабілітацыі нацызму», а скульптурная кампазіцыя нясе «невымоўныя пакуты ўсё яшчэ жывым ветэранам Вялікай Айчыннай вайны і вязням германскіх канцлагераў».

Нагадаем, паэтку і генеральную сакратарку Ураду БНР у эміграцыі Ларысу Геніюш пасля Другой сусветнай вайны арыштавалі і асудзілі на 25 гадоў лагераў, адседзела 8 год. Беларусы тройчы звярталіся ў пракуратуру з просьбай рэабілітаваць паэтку, але ўсе тры разы (у 1956, 1999 і 2017-м) атрымлівалі адмову.