«У Лукашэнкі ў лепшым выпадку будзе варыянт Мілошавіча, а ў горшым — варыянт Чаўшэску»

Вядомы расейскі публіцыст, музычны крытык, адзін зь першых прапагандыстаў рок-музыкі ў СССР Арцемій Троіцкі паставіў палітычны дыягназ беларускім уладам, якія, сьледам за прыкладам савецкай цэнзуры, у масавым парадку забараняюць сваіх ды замежных творцаў.

На думку Арцемія Троіцкага, апошнім часам у Расеі адбываецца прыкладна тое ж самае, што і ў Беларусі — з нашмат большым маштабам і нашмат большым цынізмам.

— Але што характэрна: у Беларусі гэта ўсё з боку ўладаў, асабіста ад «бацькі» паходзіць — вельмі адыёзным, няўмелым і, я б сказаў, «уколатым» чынам. Таму тут ёсьць свая адметнасьць, — сказаў публіцыст ў інтэрв’ю. —Вядома, што тычыцца таго, каб забараніць Цоя, то я перакананы: у Расеі на гэта ніхто б не пайшоў. Таму што гэта было б дзіка непапулярна, гэта было б страшна адыёзна; амаль тое ж самае, што, скажам, забараніць Высоцкага. Гэта значыць — адабраць у людзей адну зь іх любімых іконаў.

А тое, што гэта адбываецца ў Беларусі, азначае адно: беларуская сыстэма канчаткова дэградавала. Цой такой увагай мог бы толькі ганарыцца, але я чарговым разам выказваю сваё спачуваньне беларускім людзям увогуле і мэляманам у прыватнасьці з нагоды новага акту абсалютна ідыёцкага і зламыснага самадурства.

Арцемій Троіцкі раіць беларусам паднаціснуць, бо, на яго погляд, «канец блізкі гэтаму вашаму прыдурку»

—Трэба проста не губляць таго, што па-ангельску называецца momentum, то бок ня страчваць вось гэтай сілы інэрцыі, гэтага імпульсу, які ўжо набраўся. Бо я ня думаю, што Расея будзе яго ратаваць, расейскім кіраўнікам ён таксама на фіг ужо не патрэбны. Гэта, вядома, з майго боку вельмі цынічная заўвага, але я насамрэч ня думаю, што Пуцін зь Мядзьведзевым, калі пад «бацькам» там ужо ўсё максымальна моцна закалышацца, працягнуць яму руку дапамогі.

…Становішча ў Лукашэнкі проста адчайнае. Ён сам давёў сытуацыю да такой кропкі, калі яму ўжо не сысьці, як, скажам, былому прэзыдэнту Ўкраіны Кучму ці нейкаму іншаму дзяржаўнаму чыноўніку, які зьлёгку сябе скампрамэтаваў і добра надакучыў людзям. То бок у Лукашэнкі ў лепшым выпадку будзе варыянт Мілошавіча, а ў горшым — варыянт Чаўшэску. І ён гэта цудоўна разумее. Дакладна гэтак жа ўсё гэта разумеюць усе гэтыя вашы «дзяржыморды» зь беларускага КДБ, міліцыі і г.д. Што калі ўлада зьменіцца, то ім будзе вельмі дрэнна. Менавіта за тое, што яны цяпер робяць. Таму яны ідуць на нейкія адчайныя, на мой погляд, абсалютна самазабойчыя акцыі.