Раней трэба было закупацца фільтравым абсталяваньнем
Стужка Юрыя Хашчавацкага «Плошча» з'явілася на сэрвісе Google Video з ангельскімі субтытрамі.
Спасылку на арыгінал можна знайсьці тут або праз забудаваны пошук на самім
Google Video. Праўда, памер стужкі немаленькі, і карыстальнікам ADSL ці любога
іншага метада атрыманьня смачнага хуткаснага Нэту давядзецца раскашэліцца.
Аднак сытуацыя можа
неўзабаве зьмяніцца. Размовы пра лібералізацыю рынка сувязі гучаць з цягам часу
ўсё часьцей ды часьцей, а па меры набліжэньня тэрміну чарговага плацяжу за газ
прыватызацыйная актыўнасьць чынавенства б'е ўсе рэкорды. Мо й Белтэлекам спрададуць
нарэшце? Якой бы ні
была тая прыватызацыя, галоўнае — каб прыватным правайдэрам дазволілі будаваць
свае каналы сувязі ўсярэдзіне ды з краіны. Практыка Грузіі ды Польшчы паказвае,
што як толькі апэратары набываюць права будаваць вонкавыя каналы, нелімітаваны
дасяг да Сеціва стае даступным ужо цягам двух год, і нават пры адваротнае
скупцы былым манапалістам сваёй клішняй маёмасьці адкату назад ужо не бывае.
Калі ў Туркменістане народ трэба вучыць, як можна карыстацца з Інтэрнэту
і што ім можна зьмяніць, то ў Беларусі таго рабіць ня трэба. За апошнія гады ў
краіне, нягледзячы на неспрыяльныя ўмовы, вельмі дарагі Інтэрнэт ды нізкія
прыбыткі з'явілася шмат прасунутых карыстальнікаў, якія стварылі хатнія сеткі —
адэкватны, калі так можна казаць, адказ дарагому Нэту. Толькі Ракфэлеры маглі
дазволіць сабе выпампоўваць фільмы з Сеціва, таму тыя, хто мог ды хацеў тым
займацца (а такіх было шмат: вось ён, чалавечы капітал краіны) стварылі
медыя-сэрвэры, на якіх пачалі выкладаць дарагое зьмесьціва для карыстальнікаў
сваіх Сетак. Цягам апошніх двух год хатнія сеткі масава паглыналі адна адну:
аптавалакновыя каналы спарадзілі волатавыя ўтварэньні з 2000-3000 кампутараў у
спальных раёнах Менску. Не адставалі й правайдэры: да 2007 году амаль усе
зрабілі абмен дадзенымі між сваімі карыстальнікамі безкаштоўным, па сутнасьці
ствараючы паралельныя Сеткі, якія функцыянавалі цалкам аўтаномна. У іх
з'явілася сваё ўласнае радыё, а ў некаторых — нават падабенства відэаканалаў.
Што цыркулюе там — немагчыма пракантраляваць аніводнаму дзяржаўнаму
чыноўніку...
І нягледзячы на размовы Лукашэнкі пра кантроль над Інтэрнэтам, законы
рынка падмануць нельга. Спраўджана стагодзьдзямі. Раней трэба было закупацца
фільтравым абсталяваньнем.
Оцените статью
1 2 3 4 5Читайте еще
Избранное