Новае кіраўніцтва АГП абяруць на Кастрычніцкай плошчы?

Аб’яднаная грамадзянская партыя атрымала 23 адмовы на просьбу арэндаваць памяшканне для правядзення з’езду, які запланаваны на 20 красавіка. Калі месца так і не будзе знойдзена, АГП заяўляе пра намер правесці з’езд на Кастрычніцкай плошчы.

З просьбай арэндаваць памяшканне для АГП звярталася ў разнастайныя ўстановы прыватнай і дзяржаўнай уласнасці, сярод якіх малая заля комплекса “Мінск”, бібліятэка імя А.С.Пушкіна, цэнтр IBB... На сённяшні дзень яны атрымалі 23 адмовы. Да таго ж, у некаторых адказах значылася, што арганізацыя згодна даць памяшканне пад арэнду, калі гарадскія ўлады дазволяць правядзенне з’езду.

Як заявіў “Салідарнасці” старшыня Аб’яднанай грамадзянскай партыі Анатоль Лябедзька, зараз усе надзеі звязаныя з рашэннем гарвыканкама. Месяц таму кіраўніцтва партыі накіравала ў гарвыканкам адпаведны ліст, але адказу дагэтуль не атрымала.

— Нас цікавілі ўстановы, дзе можна правесці з’езд 225 дэлегатаў і размясціць гасцей. Калі станоўчы адказ ад гарвыканкаму не будзе атрыманы, мы будзем вымушаны спалучыць з’езд з акцыяй пратэсту. Месца для яе правядзення пакуль вызначаецца. Мы мяркуем, што гэта будзе Кастрычніцкая плошча, — распавёў “Салідарнасці” Анатоль Лябедзька.

Дарэчы, сябра Палітычнай рады АГП Сяргей Альфер сярод магчымых месцаў правядзення з’езду называў таксама скверык перад адміністрацыяй прэзідэнта і плошчу Незалежнасці. Калі гарвыканкам так і не вырашыць пытанне з памяшканнем, на адным з гэтых месцаў і будзе абрана новае кіраўніцтва партыі.

— З’езд АГП будзе мець справаздачна-выбарчы характар: кіраўніцтва, абранае два гады таму, мусіць даць справаздачу, а таксама павінны быць абраныя новыя кіраўнікі, — паведаміў Анатоль Лябедзька. — Таксама цягам з’езду мы плануем прыняць два важныя дакументы: “Абноўленую стратэгію АГП” і “Пасланне АГП да грамадзян, дзяржавы і бізнесу”.

Пакуль што на пасаду старшыні АГП прэтэндуюць два кандыдаты: кіраўнік партыі Анатоль Лябедзка і старшыня Лельчыцкай гарадской арганізацыі АГП Мікалай Гаўрыленка.

Дарэчы, некалі падобная сітуацыя з арэндай памяшкання для правядзення з’езду склалася ў Партыі БНФ. Тады толькі пасля пагроз кіраўніцтва партыі правесці з’езд на Кастрычніцкай плошчы Мінгарвыканкам дазволіў БНФ правесці сход ў ДК МАЗ, нягледзячы на ранейшую адмову.