Вячаслаў Кулік, Радыё Свабода
Бібліятэку Саюзу беларускіх пісьменьнікаў высяляюць у рэгіён

Найбольш каштоўныя рэчы, лісты, газэтныя падшыўкі пісьменьнікі перанесьлі ў кнігасховішча. Літаратурны фонд падрыхтаваны для адпраўкі ў адну зь бібліятэкаў у рэгіёне.

Дзе разьмесьціцца бібліятэка ў выгнаньні, удзельнікі пісьменьніцкай талакі прасілі дачасна не паведамляць. Але дакладна, што зь менскага кнігазбору, якому сёлета роўна трыццаць гадоў, у сталіцы застаецца толькі асобная частка. “Напярэдадні прэзыдэнцкая бібліятэка забрала каля васьмі тысяч кніг”, — паведаміў кіраўнік справаў Саюзу беларускіх пісьменьнікаў Анатоль Івашчанка.

(Івашчанка: ) “Падпісаныя дамовы на захаваньне нашай калекцыі. На сёньня прыпыненая праца зь бібліятэкай пэдагагічнага ўнівэрсытэту і ўнівэрсытэту культуры. Менавіта такім чынам разьвіваецца сытуацыя, бо на сёньня знойдзенае рашэньне дзеля таго, каб захаваць асноўны фонд. Пісьменьніцкі кнігазбор усё ж будзе захаваны”.

Анатоль Івашчанка ўдакладніў, што да адпраўкі за межы Менску падрыхтавана больш як 35 тысяч тамоў. Упершыню ўдзельнічае ў такой працы малады беларускі паэт Усевалад Сьцебурака:

(Сьцебурака: ) “Зразумела, што ў наш час кніжак ужо ня паляць. Але, па вялікім рахунку, гэта інквізытарскі падыход. Кніжкі есьці ня просяць. Адзінае, што мажліва цяпер, дзякуючы высілкам сяброў Саюзу, знойдзенае належнае месца. Хаця зноў-такі — гэта пакуль пад пытаньнем”.

А вось што гаворыць літаратар і выдавец Уладзімер Сіўчыкаў:

(Сіўчыкаў: ) “У гэтай бібліятэцы я пачынаў быць за чытача, калі быў студэнтам філфаку. Дзякуй Богу, тут працавала Ніна Ўладзімераўна Адамчык — заўжды прыязна кансультавала, дапамагала адшукаць патрэбныя матэрыялы. Досыць балюча бачыць паўпустыя паліцы. Тым больш, што ўзьнікаюць успаміны, калі нешта падобнае я бачыў раней у Доме творчасьці й адпачынку “Іслач”. Там бібліятэка была пераўтвораная ў більярдную залю, а кніжкі бязладна раскіданыя”.

Як раней паведамляла Радыё Свабода, 2 сакавіка Гаспадарчы суд Менску задаволіў пазоў галоўнага гаспадарчага ўпраўленьня Адміністрацыі прэзыдэнта — цяпер кіраўніцтва Саюзу мусіць пакінуць Дом літаратара й сплаціць 55 мільёнаў рублёў за арэнду.

Оцени статью:
1
2
3
4
5
Средний балл - 0 (оценок:0)