Беларускі шпіён у польскіх спэцслужбах

Адзін з супрацоўнікаў польскага Агенцтва ўнутранай бясьпекі ( скарочана — ABW, служба, якая займаецца ўнутранай бясьпекай, сярод іншага контрвыведкай і змаганьнем з тэрарызмам, аховай канстытуцыйнага ладу Польшчы) супрацоўнічаў зь беларускай выведкай.

Пра справу піша сёньня польская Gazeta Wyborcza. Паводле газэты, гэтая інфармацыя зьявілася ў штогадовай справаздачы ABW, якая трапіла ўчора ў парлямэнцкую камісію ў справе спэцслужбаў.

“У справаздачы гаворыцца, што ў Беластоку адбываецца працэс у справе былога супрацоўніка ABW, які працаваў дзеля выведкі іншай дзяржавы і быў затрымана ў лютым 2008 году. Імя гэтага чалавека ў рапарце не падаецца. Ёсьць за тое прозьвішча – Вольга Семянюк, гэта грамадзянка Беларусі, якая мелася быць сувязной у Польшчы і цяпер абвешчаная ў вышук ”, - піша Gazeta Wyborcza.

Штодзёньнік высьветліў, што гаворка вядзецца пра Робэрта Р., які да моманту затрыманьня працаваў у беластоцкім аддзеле ABW, а працэс над ім паводле артыкулу 130 крымінальнага кодэксу Польшчы (шпіёнства) засакрэчаны.

Паводле газэты, спадарыня Семянюк цягам некалькіх гадоў мела ў Беластоку фірму, але пасьля арышту Робэрта Р.зьнікла. Журналісты знайшлі яе ў зусім нечаканым месцы – на аўстрыйскай інтэрнэт-старонцы знаёмстваў у рубрыцы "Russische Frauen", дзе тая шукае “мужчыну да 60 гадоў”.