«Выходзіць, што цягам 10 год «здрадаю дзяржаве» займаліся дзяржслужбоўцы, якія набывалі ў Пашы сувеніры»

Кіраўнік Беларускай Р*ды культуры Сяргей Будкін – пра прысуд Паўлу Белавусу.

– Прысуд, канечне, вельмі цынічны да жахлівасці, – піша Будкін. – 13 год калоніі проста па факце таго, што ён – Беларус.

Яго «асудзілі» за прагу зменаў у Беларусі.

Але хіба ў нас прапісана недзе, што ўлада нязменная?

Яму закідваюць «экстрэмізм».

А хіба не з Пашынага «экстрэмізму» сілкаваліся брсмаўцы, якія скралі ў яго ідэю з Днём вышыванкі ці БТ, якое тыя вышымайкі нават купляла на розыгрыш?

Яго вінавацяць у «здрадзе дзяржаве».

Дык гэта выходзіць, што цягам 10 год пад бокам спецслужбаў штодня гэтаю «здрадаю дзяржаве» займаліся спартоўцы, дзяржслужбоўцы, пракурорскія супрацоўнікі, міліцыянты, якія набывалі ў Пашы сувеніры з нашай сімволікай…

…Ведаючы крыху Пашу, разумею, што не было ў яго спадзеву на гэтым «судзе» на тое, што яго ўнёсак ў беларускую справу прызнаюць і адпусцяць з выбачэннямі. Ён свядома зрабіў свой выбар – застацца ў краіне і працаваць на карысць Беларусі, пакуль да яго не прыйдуць.

І кожны з беларусаў можа зрабіць так, каб у будучыні Павал і ўсе тыя, хто трапілі ў турмы за свае перакананні, маглі сказаць, што ўсё, што яны зрабілі для Беларусі, было недарма.

Гэта вельмі проста і ад месцазнаходжання аніяк не залежыць.

Актыўней карыстацца беларускай мовай.

Даваць слухаць/чытаць дзеткам казкі па-беларуску.

Вывучаць гісторыю сваю роду.

Купляць беларускае (кнігі, сувеніры, музыку…).

Падтрымліваць культурніцкія ініцыятывы.

Насіць нашы Сімвалы (у сэрцы ці на сабе).

Бараніць сваё і сваіх (у віртуальнай і рэальнай прасторы)...

Толькі арганізацыяй такіх групавых дзеянняў, мы зможам аднавіць грамадскі парадак і захаваць нашу Беларусь.

Оцените статью

1 2 3 4 5

Средний балл 5(18)