У Мінску фіксуюцца выпадкі свінога грыпу

Некалькі дзён таму ў Мінску была шпіталізаваная 23-гадовая пацыентка, хворая на «свіны грып» H1N1.

— Тэмпература не збівалася, і паклалі ў інфекцыйную бальніцу, — расказала яна карэспандэнту «Нашай Нівы».

«Усю раніцу групамі, часам па 8 чалавек, прыходзяць інтэрны. Першы раз такое бачу», — напісала яна ў твітары.

Вірус H1N1, які знайшлі ў яе, той самы, які ў 2009-м выклікаў масштабную пандэмію ў свеце.

— Я не адна ляжу з такім дыягназам, — кажа пацыентка.

Праўда, у мінскай інфекцыйнай бальніцы кажуць, што прычын хвалявацца няма.

— У гэтым сёння няма навіны, цяпер мы ацэньваем свіны грып як звычайны вірус, падкрэслю — цяпер. Дзесяць год таму так, гэта была б навіна!

А цяпер не — у папуляцыі імунітэт, хвароба працякае ў лёгкай форме, нічога страшнага. Адзінкавыя хворыя былі заўсёды, а ў гэты момант няма ўсплескаў ніякіх грыпаў увогуле, толькі адзінкавыя пацыенты з рознымі вірусамі, — патлумачыў «Нашай Ніве» намеснік галоўнага доктара Мінскай гарадской клінічнай інфекцыйнай бальніцы Алег Скрыпко.

Оцените статью

1 2 3 4 5

Средний балл 2(12)