У Карпатах загінулі беларускія турысты

У Верхавінскім раёне Івана-Франкоўскай вобласьці з абрыву ў раку Чорны Чарамош з вышыні 30-40 мэтраў абрынуўся аўтамабіль зь беларускімі турыстамі, паведамляе Радыё Свабода.

Тры чалавекі загінулі.

Як паведамілі Свабодзе ў паліцыі Івана-Франкоўскай вобласьці, інфармацыю аб здарэньні аб 11.02 паведаміў відавочца.

Ва ўпраўленьні Дзяржаўнай службы ў надзвычайных сытуацыях Івана-Франкоўскай вобласьці ўдакладнілі, што ў аўто знаходзіліся 23 асобы, у тым ліку 22 грамадзяніна Беларусі і адзін (кіроўца машыны) – грамадзянін Украіны. 9 беларусаў шпіталізавалі ў Верхавінскую лякарню, стан іншых на месцы здарэньня высьвятляе хуткая мэдычная дапамога. Зьніклых няма.

Выратавальнікі паднялі з вады пашкоджаны аўтамабіль «ГАЗ-66». Знайшлі целы загінулых. У выратавальных працах удзельнічаюць 12 адзінак тэхнікі і 51 чалавек.

Напярэдадні, 5 траўня, пад час узыходжаньня на гару Вухаты Камень, у гэтым жа раёне Івана-Франкоўшчыны, траўмаваўся яшчэ адзін беларус — 33-гадовы мянчук. Ратавальнікі змаглі дабрацца да месца здарэньня толькі праз тры гадзіны пасьля атрыманьня паведамленьня, а ўжо ўвечары беларуса перавезьлі ў бліжэйшае паселішча і шпіталізавалі з траўмай нагі ў Верхавінскую лякарню.

Іншыя 16 турыстаў зь беларускай групы прадоўжылі свой маршрут.