Пяць уражаньняў ад стрыму наконт Дня Волі і адно пытаньне
Жывую трансьляцыю з паседжаньня аргкамітэту сьвяткаваньня 100-годзьдзя незалежнасьці БНР я выключыў пасьля 2 гадзін 15 хвілін. Калі палітыкі ня могуць дамовіцца наконт такой насамрэч дробнай справы, то як выглядаюць іхныя стратэгічныя перамовы, ад якіх сапраўды можа залежаць лёс краіны?
1.У сустрэчы было канкрэтнае пытаньне — што рабіць з прапановай Менгарвыканкаму наконт 25 сакавіка. Амаль 2 гадзіны заняло пераўтварэньне рабочай групы ў аргкамітэт і наданьне паўнамоцтваў групе на перамовы зь Менгарвыканкамам.
Людзі, якія, агулам кажучы, выйшлі з адной палітычнай кампаніі 90-х гадоў, паводзілі сябе так, нібыта яны прадстаўнікі нацыянальных урадаў на саміце Эўразьвязу, дзе вырашаецца памер датацыяў на пяцігодку. І таму кожны намагаўся бараніць свой інтарэс і рэдка чуў іншага.
2.Удзельнікі сустрэчы — паважаныя, разумныя і самаахвярныя людзі. Але калі яны зьбіраюцца разам, то адбываецца нешта незразумелае. А то ўшчыкнуць адзін другога, папракнуць, скрытыкаваць, узгадаць старую крыўду, скрывіцца, пачаць гаварыць пра 90-я, закатаць вочы ў лоб, нешта ўспомніць з маладосьці, кінуць пафас, узьняць голас.
3.Спрэчкі на пустым месцы добра глядзяцца ў дэмакратычным парлямэнце, дзе дэпутаты хочуць казаць сваю дзёрзкасьць і арыгінальнасьць перад выбарнікамі. Але каму патрэбнае шоў на паседжаньні аргкамітэту сьвяткаваньня 100-годзьдзя БНР?
4.Палітыка — гэта мастацтва магчымага. І гэта ў залі, на жаль, паказалі адзінкі. Ад гэтых адзінак можна было пачуць сапраўдны клопат і дбаньне пра інтарэс Дня Волі і яго ўдзельнікаў. Рэшта паводзіла сябе нібы падчас выбарчай кампаніі ў парлямэнт. І прычына ў адсутнасьці даверу адзін да другога, у незразумелай канкурэнцыі невядома за што.
5.Калі беларуская дэмакратычная апазыцыя сапраўды хоча калі-небудзь выйграць у свабодных выбарах, то ёй трэба тэрмінова забараніць тэлекамэрам прысутнічаць на сваіх паседжаньнях. Або проста пачаць размаўляць паміж сабой па-іншаму. Але першае хіба пакуль больш рэальнае.
Чаго тады вартыя ўсе беларускія дэмакратычныя партыі, рухі, кааліцыі, аргкамітэты, арганізацыі, суполкі, калі іх нават 100-годзьдзе БНР ня ў стане аб’яднаць?
Оцените статью
1 2 3 4 5Читайте еще
Избранное