Памерла самая публічная супрацоўніца мінскага АМАПу. Ёй было 29 гадоў
Святлана Скаражонак — самая публічная супрацоўніца жаночага ўзводу мінскага АМАПу. Пра яе кар’ерны шлях шмат разоў расказвалі дзяржаўныя СМІ — з сям’і бацькі-афганца, вывучылася на піяршчыка, але пайшла служыць, піша Наша Ніва.
Днямі Святлана памерла. Абставіны смерці невядомыя.
Кіраўніцтва МУС і кіраўніцтва мінскага АМАПУ выказалі спачуванні яе родным праз старонкі ведамственнай газеты «На страже».
Святлане Скаражонак было 29 гадоў, яна паходзіла з Нясвіжа. Бацька-памежнік ў савецкія часы служыў у Афганістане і Туркменістане, маці — культработнік. Святлана была адзіным дзіцём у сям’і.
Скончыла факультэт філасофіі і сацыяльных навук БДУ, а пасля прайшла падрыхтоўку ў навучальным цэнтры МУС і ў 2014 годзе стала служыць у АМАПе.
У папярэдніх інтэрв’ю Святлана Скаражонак расказвала, што яе малады чалавек таксама служыць у АМАПе: «У нас з Максімам акрамя службы шмат агульнага, я б наўрад ці змагла сустракацца з чалавекам «з грамадзянкі». Калі ў нас супадаюць выхадныя, адпраўляемся на велапрагулкі ў парк, ходзім у кіно, тэатры».
Пытанне, ці мае смерць Святланы Скаражонак крымінальны характар, афіцыйны прадстаўнік ГУУС Мінгарвыканкама пакінула без каментароў.
Читайте еще
Избранное