Неюбiлейныя развагi
Сёння цяжка ўявiць сабе, што зусім нядаўна (па мерках гісторыi) радыё і тэлебачання проста не было. Не будзіў раніцай знаёмы голас: “Гаворыць Мінск!” і не трымаў каля сябе да позняй начы блакітны экран з самымі апошнімі навінамі свету ці захапляльнымі серыяламі...
А гэта
ж сапраўды так: усяго некалькі дзён таму назад споўнілася 80 год Беларускаму
радыё, а праз паўтара месяца 60-гадовы юбілей адзначыць наша тэлебачанне.
Ажно не верыцца — іхнія “равеснікі” яшчэ жывуць побач з намі,
а “тэлеаднагодкі” дык і наогул толькі зараз заслужылі права пайсці на пенсію.
Мы прывыклі, што гэтак было заўсёды: з дапамогаю радыёхваляў ці тэлесігналу мы
штодзённа падключаны да вірлівага жыцця цэлай планеты і менавіта ад іх
даведваемся пра падзеі і далёка за акіянамі, і ў сваім родным горадзе ці
суседняй вёсцы.
Аднойчы цікаўныя сацыёлагі запыталіся ў людзей самых розных
прафесій і ўзростаў, ад чаго яны гатовыя адмовіцца ў сваёй кватэры, калі б ім
прапанавалі выбіраць паміж халадзільнікам і тэлевізарам. Большасць, не
вагаючыся, назвала халадзільнік. Так што, калі казаць пра тое, без чаго
сучаснікі не ўяўляюць сабе нармальнага жыцця, дык, хочацца нам гэтага ці не, а
тэле- і радыёвяшчанне займаюць бясспрэчнае месца сярод патрэб першай
неабходнасці. Іншая гаворка, якой якасці іхні “прадукт” і наколькі ён спрыяе
маральнаму і інтэлектуальнаму прагрэсу.
Як чалавек, што аддаў айчыннаму радыёвяшчанню і тэлебачанню
ладны кавалак свайго жыцця, прафе-сійнага досведу і творчых парыванняў, я
радуюся салідным юбілеям, якія святкуюць мае калегі, і са шчымлі-вай, нават
прыдзірлівай увагай яшчэ раз узіраюся ў нялёгкія і слаўныя шляхі, пройдзеныя не
адным пакаленнем журналістаў, рэжысёраў, тэхнікаў, часта зусім невядомых
мільёнам слухачоў і гледачоў. Хапіла на іхніх пуцявінах і беднасці, і
бязлітасных вайсковых віхур, і несправядлівых папрокаў, і вымушанай
кан’юнктуршчыны, але ж былі і вялікія і малыя перамогі, і людская любоў, і
шчаслівае адчуванне далучанасці да Яе Вялікасці Гісторыі. На жаль, нямнога
засталося іх, ветэранаў эфіру, нястомных і сціплых, самаадданых і неабыякавых.
І першыя словы віншавання і ўдзячнасці сёння — ім, і вядомым, адзначаным
званнямі і ўзнагародамі, і дагэтуль непрыкметным, сівагаловым, нярэдка нямоглым
і пазабытым. На зладкаваным імі падмурку маладыя і амбітныя нашчадкі ўзводзяць
сёння сучасныя светлыя гмахі вяшчальных студый і небывалай вышыні вежы, шукаюць
новых вобразаў і тэм, новых герояў і выяўленчых сродкаў. Дай Божа ім
настойлівасці і ўмельства, прынцыповасці і ўдачы!.. Толькі не варта забываць зробленае
папярэдні-камі і грэбліва адкідаць вартыя памяці і працягу традыцыі. А вось з
гэтым, як мне здаецца, у цяперашніх гаспадароў эфіру і экранаў маюцца
сур’ёзныя, цяжка вытлумачальныя праблемы.
Праглядаючы і праслухоў-ваючы некаторыя так званыя юбілейныя
праграмы, я раптам зрабіў адкрыццё, што з летапісу нашых электронных СМІ выпаў
як мінімум дзесяцігадовы перыяд. Архіў-ныя кадры і запісы неяк вельмі ўжо
старанна імкнуцца абыйсціся без многіх папулярных у свой час перадач і добра
вядомых, як модна казаць, знакавых асоб. У розных тэлеўспамінах, напрыклад,
чамусьці не называюць народную артыстку Зінаіду Аляксандраўну Бандарэнку, якая
для шматмільённай тэлеаўдыторыi доўгія гады была непаўторным тварам і голасам
Беларусі. Прыгадваюць яе шаноўных калег, яе таленавітых вучняў, а вось пра яе
сарамліва маўчаць, быццам яе і не было зусім, быццам ёю не захапляліся, быццам
не яна на самых высокіх урачыстасцях і канцэртах была абавязковым упрыгожаннем
іх. Што — памяняліся крытэрыі жаночай абаяльнасці, безна-дзейна састарэлі
дабрыня і спагадлівасць, якімі так і свяцілася мілая Зінаіда Аляксандраўна?..
Ну а на радыё “забыліся” запрасіць да юбілейнага мікрафона, у
прыватнасці, аднаго з найлепшых рэпарцёраў 80-90-х гадоў мінулага стагоддзя
Анатоля Палонскага, палымянага публіцыста Васіля Макарэвіча, клапатлівую
“гаспадыню” незабыўных музычных сустрэч Галіну Цвяткову... Што — ім няма што
сказаць ці, можа, яны не “дацягваюць” да неабходнага ўзроўню творчасці?
Асмелюся сцвяр-джаць, што прычына зусім у іншым — у іхняй неадпаведнасці
“генеральнай лініі” сённяшніх ідэалагічных босаў, у іхняй самазабыўнай
адданасці беларускаму слову і беларускай песні.
Як ні горка казаць, але апошнія гады і наша радыё, і — тым
больш — тэлебачанне ўсё далей адыходзяць ад нацыянальнай асновы, усё больш
касмапалітызуюцца і проста палітызуюцца, перастаючы быць неад’емнай і важнай
часткаю беларускай культуры. Парктычна знікла такая выдатная з’ява, як
радыётэатр, не кажучы ўжо пра тэлетэатр. А яны ж былі ў свой час вельмі
прыкметнымі і паважанымі не толькі ў нас, а і ў братніх Расіі і Украіне. Амаль
не чуем мы найлепшых нашых майстроў мастацкага слова ні ў праграмах
тэлебачання, ні ў перадачах радыё...
Радыёжурналіст В.Саламахін у перадюбілейныя дні вынес жорсткі
прысуд грахам і сваіх настаўнікаў, і маім, як былога старшыні Дзяржтэлерадыё.
Не з абы якім запалам ён абвінаваціў мяне ў тым, што я “нават рэпартажы пра
футбол прымушаў весці па-беларуску”. (!)
Ах, даражэнькі Віталь! Па-першае, не прымушаў, а —
патрабаваў. А гэта, як кажуць у Адэсе, дзве вялікія розніцы як для знаўцы мовы.
Так, патрабаваў, бо гэта дыктаваў прафесійны статус супрацоўнікаў Беларускага
радыё. Дарэчы, нешта я не памятаю нязгоды, а тым больш пратэсту з боку
тагачаснага маладога журналіста. А па-другое, пасталелы Віталь Юр’евіч, вы павін-ны
здагадвацца, што палітычныя ветры нярэдка мяняюць свой накірунак — хто ведае,
ці не давядзецца вам праз нейкі час выціраць твар ад уласных пляўкоў у бок тых,
хто быў дарадцам на самым пачатку вашых працоўных дарог...
Сумна бачыць, як забываюцца слаўныя традыцыі, як вытоптваецца
зялёнае поле творчасці, засеянае сумленнымі і таленавітымі папярэднікамі, як з
людскіх душ хітра выганяюцца такія натуральныя пачуцці памяці і ўдзячнасці, як
запаланяе эфір бяздумная чужая папса, а блакітны экран ажно скаланаецца ад
шматсерыйных крывавых “разборак” і зласлівых палітычных шоу... Усё цяжэй з
кожным годам, але ўсё ж упарта верыцца, што скончыцца гэткае і ў эфір вернуцца
і беларускія вершы, і беларускія песні, а з экрана (як часам робіць канал
“Лад”) на нас зноў зірнуць дарагія абліччы нашых шаноўных артыстаў, мастакоў,
кампазітараў. Я ўпэўнены — так будзе! Таму і віншую роднае радыё і тэлебачанне
з юбілеямі і спадзяюся на іхнюю шчаслівую будучыню, не менш слаўную і яркую,
чым нядаўняе мінулае...
Оцените статью
1 2 3 4 5Читайте еще
Избранное