Ліцэй ставіць “Народны альбом” у Варшаве.

Сёлета ў падпольны Гуманітарны ліцэй імя Якуба Коласа паступіла каля 30 вучняў. Калі-небудзь і яны паедуць у Варшаву ставіць "Народны альбом".

Гуманітарны ліцэй імя Якуба Коласа, быў ліквідаваны загадам міністэрства адукацыі ў 2003 годзе, але дзейнасці сваёй не спыніў. Сёння яго называюць проста – Ліцэй, а вучні гавораць – “партызанская школа”.

У Беларусі ліцэй працуе ў рэжыме канспірацыі, але нават у такіх умовах сёлета навучальная ўстанова прыняла больш чым у мінулыя гады – каля 30 вучняў. Уладзімір Колас, стваральнік і дырэктар ліцэя, упэўнены, што вучні і бацькі не пашкадаюць пра свой выбар: “Ніхто з нашых выпускнікоў не знік, усе яны здзейсніліся, атрымалі выдатную адукацыю і пераважная большасьць мае вельмі добрую працу”

Штогод ў канікулы памяшканні для партызанскай школы прадстаўляе Польшча. Сёлета ліцэісты і настаўнікі працавалі ў Закапаным, Гданьску, цяпер яны ў Варшаве. А канікулы ў ліцэістаў будуць у верасні.

У кожным з гарадоў ліцэісты ставілі “Народны альбом”, п’есу аўтарства Лявона Вольскага і Міхала Анемпадыстава.

“ Народны альбом – гэта эпоха, калі заходняя Беларусь была ў складзе Рэчы Паспалітай, дзе будавалася буржуазная дэмакратыя, былі пэўныя свабоды, і людзі мелі магчымасьць жыць паводле уласных памкненняў, -- кажа Уладзімір Колас. -- І Усходняя Беларусь у складзе Савецкага Саюза, дзе можна было любіць толькі Сталіна, дзе цякла крывя, народ абалваньвалі утапічнымі лёзунгамі. Пра гэта і ёсьць “Народны Альбом”. Катастрафічныя маральныя і культурныя страты мы нясем за тое, што гэты перыяд быў вырваны з нашай гісторыі, перахлушаны. Цяпер трэба аднаўляць гістарычную справядлівасьць гэтай эпохі.”

Зараз чарга прыйшла на пастаноўку спэктакля ў Варшаве. Ліцэісты маюць вельмі амбітныя планы.

Уладзімір Колас: “У кастрычніку мы зноў прыедзем у Варшаву, дзе пры супрацы з юнацкімі тэатральнымі студыямі паставім “Народны альбом” з удзелам палякаў і пакажам гэты сумесны праект на некалькіх тэатральных фестывалях. Увосень мы ўжо запрошаныя на гданьскі фестываль нацыянальных меншасцяў і на некалькі варшаўскіх тэатральных фестываляў. Пра нашую сумесную працу над “Народным альбомам” запланаваны дакумэнтальны фільм, прадусарам якога будзе польскі рэжысёр Мірэк Дембіньскі. А потым, калі гэтым праектам дастаткова зацікавяцца, мы зробім тэлевізыйны мюзікл, які, як мінімум, будзе паказаны па Белсату.”

Адзін з аўтараў п’есы Міхал Анемпадыстаў новай ліцэйскай пастаноўкі пакуль не бачыў:

“Я як у савецкія часы, толькі наадварот – не бачыў, але стаўлюся станоўча, бо гэта адраджэнне вучнёўскіх тэатраў – старой еўрапейскай традыцыі, якая была і ў Беларусі. А як аўтару мне вельмі прыемна, што ліцэісты абралі менавіта “Народны альбом”.

Оцените статью

1 2 3 4 5

Средний балл 0(0)