Политика 28.03.2011

«Куляшова – у адстаўку!»

Управа Партыі БНФ адзначае, што 25 сакавіка спецслужбамі краіны дзесяткі чалавек былі прэвентыўна затрыманыя без законных падставаў, а супраць шэрагу актывістаў узбуджаныя справы аб адміністратыўных правапарушэньнях па відавочна хлусьлівых сьведчаньнях.

Ад незаконных дзеяньняў спецслужбаў і міліцыі пацярпелі шэраг сябраў і кіраўнікоў Партыі БНФ. Асаблівае абурэньне выклікаюць брутальнае зьбіцьцё і безпадстаўнае затрыманьне кіраўніка Магілёўскай абласной арганізацыі Партыі БНФ Зьміцера Салаўёва. Высунутыя супраць сп. Салаўёва абвінавачаньні Управа Партыі БНФ ацэньвае як неабгрунтаваныя ды безпадстаўныя. Нанясеньне траўмаў пры затрыманьні сп. Салаўёва Управа БНФ разглядае як акт фізічнай помсты палітыку ў сувязі з ягонай грамадзка-палітычнай дзейнасьцю. Занепакоенасьць і трывогу выклікае таксама зняволеньне Віктара Івашкевіча ды іншых асобаў па хлусьлівым абвінавачаньні ў «хуліганстве».

Управа Партыі БНФ заклікае міністра унутраных справаў Анатоля Куляшова падаць у адстаўку на падставе няздольнасьці забяспечыць правапарадак і выкананьне правоў грамадзянаў. Вінаватыя ў палітычных рэпрэсіях супрацоўнікі МУС і КДБ мусяць быць адхіленыя ад працы.

Управа Партыі БНФ настойліва заклікае адказныя палітычныя партыі і рухі да кансалідацыі на глебе ўзгодненай стратэгіі дзеля хутчэйшага вызваленьня ўсіх палітзняволеных і вяртаньня краіны на шлях законнасьці.