Карбалевіч: Беларуска-польскія адносіны настолькі дрэнныя, што картай паляка іх наўрадці дадаткова сапсуеш

1 жніўся правіцель выказаўся пра дакумент, уладальнікі якога ў Беларусі сутыкнуліся з масавым пераследам з боку сілавікоў. Пры гэтым Аляксандр Лукашэнка зрабіў некалькі супярэчлівых заяваў.

— А што датычыцца карткі паляка, ну мы добра падрэзалі крылы гэтым людзям. Адчуваю, што гэта тэма ёсць. Мы яшчэ раз вернемся да гэтай праблемы, — спачатку прагучала гэта.

Потым Лукашэнка прывёў прыклад, што ў Гродна нібыта ёсць прадстаўнікі ўлады, якія маюць карту паляка. І дадаў:

— Вельмі націскаць не трэба на людзей. Людзі павінны жыць свабодна на сваёй зямлі, у сваім грамадстве. Каб яны выказвалі пазіцыю сваю, нікога не баяліся. У адваротным выпадку навошта такая дзяржава, дзе будуць націскаць на людзей. Таму вельмі важна не перагнуць палку.

Палітолаг Валер Карбалевіч пракаментаваў Филину выказванні правіцеля.

— Ці азначае гэта насамрэч прызнанне таго, што сілавікі перагнулі палку, што справа магчыма дайшла да кагосьці з чыноўнікаў? Чаго цяпер варта чакаць — ці можа гэтая карная кампанія на нейкі час сцішыцца?

— Я думаю, што тут ёсць пэўная супярэчнасць, якая вельмі ўласцівая Лукашэнку ды іншым высокім чыноўнікам, калі іх словы і справы разыходяцца ў супрацьлеглыя бакі.

Таму што па ўсёй краіне ладзіцца кампанія супраць уладальнікаў карты паляка. На мяжы іх спыняюць і патрабуюць адмовіцца ад яе. На прадпрыемствах супрацоўнікаў выклікаюць і прымушаюць адмовіцца (пра «Гродна-Азот» такая інфармацыя была).

Асаблівы размах кампанія набыла супраць людзей, якія працуюць у бюджэтнай сферы, у дзяржаўным сектары, магчыма і ў дзяржаўным апараце.

Гэтая кампанія ідзе, яна развіваецца. І тое, што кажа Лукашэнка, абсалютна не адпавядае таму, што робіцца на месцах. Таму я б не звяртаў асаблівай увагі на гэтыя словы. Думаю, што працэс гэты будзе працягвацца.

Бо Польша аб’яўленая ці не галоўным ворагам. І зразумела, што ўладальнікі карты гэтай ці не галоўнай варожай для рэжыму краіны фактычна становяцца ворагамі.

— Гэта выключна ўнутраная гісторыя, ці сігнал Польшчы ў тым ліку? Калі сігнал, то які?

— Сігнал на адрас Польшчы я ўбачыў у іншым. Там, дзе Лукашэнка сказаў, што нібыта няма пагрозы ў тым, што каля мяжы з’явілася сотня «вагнераўцаў». Што яны нібыта проста трэніруюць беларускіх вайскоўцаў.

Што няма пагрозы прарыву расійскімі наёмнікамі Сувалкскага калідору. Вось тут я пабачыў сігнал Варшаве, які трошкі супакойвае.

І гэты сігнал, ізноў жа, супярэчыць таму, што Лукашэнка нядаўна казаў у Санкт-Пецярбургу Пуціну. Маўляў, «вагнераўцы» хочуць схадзіць на «экскурсію» ў Польшчу, а я іх не пускаю.

Гэта такі хутчэй пазітыўны сігнал: «Не бойцеся, мы не збіраемся ажыццяўляць нейкія сілавыя дзеянні».

— То бок, у выпадку з картай паляка мы маем выключна ўнутрыбеларускі аспект?

— Так, я думаю, што гэта ўнутраная гісторыя. І да беларуска-польскіх адносінаў яна вялікага дачынення не мае. Яны настолькі дрэнныя, што картай паляка іх наўрадці дадаткова сапсуеш.