Эксклюзіўны канцэрт «Крамбамбулі» на Дзень Святога Патрыка

17 сакавіка ў сталічным пабе «Госці» «Крамбамбуля» парадуе добрых людзей новымі песнямі і любімымі хітамі – у гонар старажытнага ірландскага свята.

Апякун Ірландыі Святы Патрык жыў аж у 5-м стагоддзі н.э., але пакінуў пасля сябе столькі пазітыву, што ўдзячныя прадстаўнікі ірландскага ды іншых народаў дагэтуль ушаноўваюць яго ўсімі даступнымі спосабамі – у тым ліку актыўным ужываннем спіртных напояў, танцамі і спевамі. Акрамя бяскроўнага хрышчэння Ірландыі ды выгнання з яе змеяў, Святому Патрыку прыпісваюць яшчэ і вынаходства віскі. “Крамбамбуля” вырашыла, што ніяк не можа абысці ўвагай свята такога выбітнага чалавека.

“Мы зайграем свой новы альбом, над якім працавалі цэлы год. Са сцэны большасць гэтых песень яшчэ не гучала, таму для нас гэта таксама прэм’ера, – прызнаецца лідар праекту Лявон Вольскі. – Гэта зусім новая “Крамбамбуля”, якую мы самі для сябе нечакана адкрылі. Усіх сакрэтаў раскрываць не буду – скажу толькі, што было шмат эксперыментаў з формай, але наша “крамбамбульная” сутнасць засталася нязменнай. Да таго ж, 17 сакавіка дух Святога Патрыка будзе з намі, таму станоўчыя эмоцыі і добрая энергетыка гарантаваныя!”

Квіткі на канцэрт, коштам ад 20 000 да 85 000 беларускіх рублёў, можна набыць у адміністратара паба "Госці" альбо замовіць па тэлефоне + 375(29)700-33-00. Адрас: пр-т Незалежнасці, 25.