Общество
Зміцер Панкавец, «Наша Ніва»

«Чаму вы лічыце, што можаце вызначаць за мяне будучыню?!»

Карэспандэнт «НН» стаў сведкам дыялогу, былога міліцыянта, сябра АГП Мікалая Казлова і кіраўнічкі ўчастковай выбарчай камісіі №24 Алеўціны Гладкай.

Мікалай Казлоў учора зафіксаваў на ўчастку «карусельшчыкаў». Звесткі незалежных назіральнікаў і афіцыйныя звесткі не супадаюць на 213 чалавек.

Алеўціна Гладкая: Як ваша здароўе, скажыце?

Мікалай Казлоў: Маё? Выдатна. Увесь час пра вас думаю.

АГ: Пра мяне? Я вас сёння сніла.

МК: Вось бачыце – гэта ўзаемна. Хто каго перадумае (смяецца).

АГ: Але я вам не прыснілася?

МК: Не.

АГ: Не магу расказаць, але які быў прыемны сон! Я вось думаю, чаму я вас ніколі спаткаць ніколі не магу, бо вы ўвесь час, як той магнат, на машыне. А я стараюся дзесьці пешшу хадзіць. Я вось сёння казала Святлане [назіральніца ад АГП – «НН»], што ў гэтага чалавека, апроч усяго палітычнага, ёсць павага да жанчыны. І нават не да мяне, а ўвогуле. Гэта адна з вашых выдатных якасцяў.

МК: Дзякуй, Алеўціна Мікалаеўна, але гэта не адмяняе таго, што вы творыце... Гэта жахліва! Проста жахліва. Гэта не ўлазіць ні ў якія вароты.

АГ: Беражыце здароўе.

МК: Дзе ж тут з вамі яго зберажэш. Ох...

АГ: І псіхічнае, і фізічнае. Калі б я падымала тост, то ўзняла яго за ваша псіха-фізічнае здароўе.

МК: Дзякуй вялікі. Калі б не вы тут, яно б у мяне было выдатнае.

АГ: Ведаеце, выбары пройдуць, а жыццё працягнецца.

МК: Так, дык у тым і справа, што вы будучыню вызначаеце, у тым ліку і маю. Кідайце вы гэтую справу. Аўлеціна Мікалаеўна, не ідзіце вы болей у камісію. Не ідзіце, ну не ваша гэта.

АГ: Я разумею вашу непаслядоўную пазіцыю.

МК: Вы лічыце, што я вас агаворваю?

АГ: Я – вас, а вы – мяне. Што выходзіць, мы з вамі знаходзімся на супрацьлеглых баках.

МК: Хочаце сказаць, што я вас усе 7 гадоў агаворваю? Вы лічыце, што ў мяне бзік на вас?

АГ: У вас ёсць стрыжань. Вы мяне круціце як палітык. Кажаце, што як старшыня камсіі, я такая-сякая. Але мае чалавечыя якасці вы ніколі не закранулі.

МК: Я лічу, што службовыя і чалавечыя якасці павінны быць гарманічнымі. Калі іншая за межамі ўчастка – можа быць. Чаму вы лічыце, што можаце вызначаць за мяне будучыню?! Ну нельга так.

АГ: Правільна, кожны з нас сам выбірае.

МК: Калі вы ўкідваеце бюлетэні на ўчастку, то вы бярэце на сябе права вырашаць за мяне.

АГ: Ні ў якім выпадку.

Оцените статью

1 2 3 4 5

Средний балл 0(0)