Беларуская праваслаўная царква лічыць фільм пра БХД «заказным палітычным матэрыялам»

Прадстаўнік Беларускай праваслаўнай царквы па сувязях са СМІ назваў фільм пра БХД «заказным палітычным матэрыялам, які выклікаў у епіскапаце вельмі негатыўную рэакцыю».

Афіцыйны прадстаўнік Беларускай праваслаўнай царквы пракаментаваў прэс-службе аргкамітэту па стварэнні партыі Беларуская Хрысціянская Дэмакратыя выказванні некаторых прадстаўнікоў Царквы ў адрас БХД. Яны прагучалі ў матэрыяле Беларускага тэлебачання, паказаным перад візітам патрыярха Кірыла ў Беларусь.

Архімандрыт Аляксей у гутарцы з прэс-службай БХД адзначыў, што «гэты заказны палітычны матэрыял, тым больш, паказаны падчас візіту ў нашу краіну патрыярха Кірыла, выклікаў у епіскапаце вельмі негатыўную рэакцыю».

Архімандрыт Аляксей таксама адзначыў, што Царква «ні ў якім выпадку не выступае супраць хрысціянска-палітычных партый і рухаў, а наадварот, вітае дзейнасць падобных і іншых палітычных арганізацый, калі іх канцэпцыя не супярэчыць хрысціянскай маралі і хрысціянскіх каштоўнасцяў».

У сюжэце, паказаным па БТ, выказваўся загадчык юрыдычнай службай Мінскага епархіяльнага ўпраўлення Беларускага Экзархата Андрэй Алешка, а таксама протадыякан Андрэй Кураеў, клірык Маскоўскай епархіі. Паводле архімандрыта Аляксея, спадар Алешка выказваў сваё асабістае меркаванне аб БХД, якое супярэчыць нават афіцыйнаму царкоўнаму дакументу «Асновам сацыяльнай канцэпцыі Рускай Праваслаўнай Царквы».

А Андрэй Кураеў ўвогуле не меў права выказвацца аб палітычнай і сацыяльнай сітуацыі ў Беларусі, так як з’яўляўся толькі госцем беларускага Экзархата. «Мы б не хацелі, каб прыватныя думкі сталі пачаткам негатыўных адносін Беларускай Праваслаўнай Царквы з хрысьціянска‑палітычнымі рухамі. Мы зноў сведчым, што Царква, ажыццяўляючы сваё служэнне ў беларускім грамадстве, служыць выключна для стварэння свету і згоды ў нашым народзе і царкоўным асяроддзі», -- адзначыў прадстаўнік Беларускай праваслаўнай царквы.