Батура пра рэстаран ля Курапат: «А што бачыць? Увесь свет такі. Жыццё ж працягваецца»
Iмя былога старшыні Мінскага аблвыканкама Барыса Батуры ўсплыло ў сувязі з сітуацыяй з адкрыццём рэстарана ў Курапатах.
Высветлілася, што яшчэ ў 2012 годзе Генеральная пракуратура сумесна з Міністэрствам культуры прапаноўвала яму спыніць будаўніцтва так званага «Бульбаш-хола», які цяпер мае назву «Паедзем паядзім».
Тагачасны намеснік генеральнага пракурора Мікалай Кукліс дасылаў на імя Батуры прадстаўленне, дзе пісаў аб парушэннях пры будаўніцтве, а таксама заклікаў пакараць вінаватых і, магчыма, нават спыніць будаўніцтва. Аднак Батура гэтага не зрабіў. У 2018 годзе рэстаранны комплекс запрацаваў.
Мы датэлефанаваліся да былога чыноўніка, але надта шмат словаў з Барыса Батуры выцягнуць не атрымалася.
— Я не помню. Я не помню абсалютна. Можа быць іншыя людзі гэтым займаліся, а не я. Можа, і быў такі зварот ад генпракуратуры, але я гэтым не займаўся.
— А вы сочыце за сітуацыяй у Курапатах сёння?
— Ды не… Я ж цяпер пенсіянер.
— І не ведалі, што ваша імя цяпер сталі ўспамінаць у сувязі з гэтай гісторыяй?
— Не чуў [кажа па-беларуску — «НН»].
— Пра сам рэстаран помніце хоць нешта?
— Ды даўно гэта было. Шчыра кажучы, і ўспамінаць не хочацца.
— Як вы ставіцеся да Курапатаў? Што думаеце пра гэтае месца?
— Я б зрабіў там мемарыял, каб нармальна было ўсё.
— А тое, што побач рэстаран, нічога кепскага не бачыце?
— Я не бачу. А што бачыць? Увесь свет такі. Жыццё ж працягваецца. А вось комплекс у саміх Курапатах трэба нейкі зрабіць.
— Вы самі бывалі ў Курапатах?
— Быў, канечне.
Оцените статью
1 2 3 4 5Читайте еще
Избранное