Актывісты БХД распачалі бестэрміновую акцыю абароны касьцёла Сьвятога Язэпа (фота)

Актывісты стваранай партыі «Беларуская хрысьціянская дэмакратыя» распачалі бестэрміновую акцыю абароны касьцёла Сьвятога Язэпа ў Менску. 17 верасьня прайшла першая акцыя. У ёй удзельнічалі хрысьціянскія дэмакраты шэрагу краінаў, а таксама беларускі бард Андрэй Мельнікаў.

Акцыя распачалася супольнай малітвай пад пільным наглядам супрацоўнікаў міліцыі ў цывільным. Яны фільмавалі ўсіх прысутных, але не затрымлівалі. Як мяркуюць арганізатары — магчыма, таму, што падтрымаць паплечнікаў прыйшлі хрысьціянскія дэмакраты з розных краін. Адзін зь іх — расейскі дысыдэнт Аляксандар Агароднікаў:

– Я палічыў сваім абавязкам тут быць. І мне вельмі прыемна, што ёсьць актыўныя беларусы, якія бароняць сваю сьвятыню ад глуму. Для мяне проста гонар тут быць.

Яшчэ адзін хрысьціянскі дэмакрат, віцэ-сьпікер парлямэнту Грузіі Георгій Рухадзэ, які таксама прыйшоў да касьцёла Сьвятога Язэпа, гэтак пракамэнтаваў стасункі вернікаў і ўладаў у Беларусі:

– Такіх праблем, як тут, у нас няма — няма праблем рэгістрацыі і палітычнай дзейнасьці. Канечне, гэта праблемы рэжыму, а таму дыпляматычнымі шляхамі мы будзем дапамагаць хрысьціянскім дэмакратам Беларусі.

За вяртаньне касьцёла Сьвятога Язэпа вернікам, а таксама за тое, каб спыніць перабудову кляштара ў забаўляльны цэнтар, цягам пяці гадоў змагаецца група вернікаў-католікаў. Адна зь іх, Ганна Сіўчык, вітае новых людзей, якія далучыліся да абароны сьвятыні:

– Натуральна, што мы вельмі ўдзячныя гэтым людзям, якія ў гэты цяжкі час, калі сьвятыня зьнішчаецца, сталі на яе абарону. Тым больш што ведаем, што сярод іх ёсьць ня толькі католікі, але і вернікі іншых канфэсій.

Адзін зь лідэраў Партыі БХД Павал Севярынец зачытаў зварот да старшыні Менгарвыканкаму Мікалая Ладуцькі, а таксама да кіраўніка будаўнічага прадпрыемства «Мінская спадчына». Севярынец гэтак пракамэнтаваў сёньняшнюю падзею:

– Мы зьбіраемся каля касьцёла Сьвятога Язэпа, каб ня даць ператварыць сьвятыню ў бардэль. Мы запрашаем усіх неабыякавых людзей, моладзь прыходзіць сюды штодня а 19:00. Тут будуць акцыі, віктарыны, канцэрты. Мы будзем зьбірацца, нават калі нас будуць атачаць і затрымоўваць. Прыйшоў час — падчас прэзыдэнцкіх выбараў якраз і ёсьць спадзяваньні на зьмены.

На завяршэньне акцыі ў абарону касьцёла Сьвятога Язэпа перад прысутнымі выступіў бард Андрэй Мельнікаў.

Прамаўляе Павал Севярынец

Сярод удзельнікаў прысутнічалі хрысьціянскія дэмакраты зь іншых краінаў

Сьпявае Андрэй Мельнікаў