Ад «Крамбамбулі» да Lady Gaga. Хто патрапіў у новы «чорны спіс» выканаўцаў у Беларусі

Па інфармацыі Беларускай Р*ды культуры, гэта спіс выканаўцаў, чые песні забаронена выконваць у Беларусі. Ён быў перададзены ў дзяржаўныя ўстановы, звязаныя з арганізацыяй канцэртаў. Імаверна, спіс складаўся ў КДБ.

КДБ заўжды меў дачыненне да кантролю над эфірнай палітыкай і гастрольнай дзейнасцю, але адказвала за гэта адміністрацыя прэзідэнта. Кажуць, цяпер КДБ кіруе ўсёй ідэалогіяй у краіне і больш актыўна ўключыўся ў кантроль, каб не дапусціць вальнадумства.

Сяргей Будкін, кіраўнік Беларускай Р*ды культуры

У апублікаваным спісе 80 выканаўцаў — як беларускіх, так і замежных. У спіс трапілі Шэр і Ларыса Грыбалёва, Ганна Шаркунова і Lady Gaga, Ксенія Сітнік і Макс Корж, гурты «Нейра Дзюбель», NRM, «Крамбамбуля», Navi Band, ДДТ, браты Меладзэ і іншыя.

— Калі узьнік першы чорны сьпіс у Беларусі (куды я са сваімі праектамі, безумоўна, патрапіў), памятаю, па тэлевізары йшла нейкая агітацыйна-прапагандысцкая перадачка, і ў ёй раптам пачалі «кляйміць пазорам» беларускіх музыкаў і асабіста мяне, — успамінае Лявон Вольскі. — Злавесным голасам дыктар вяшчаў: «Гэта ён (то бок, я), калі ўся Беларусь радавалася трыумфальнай перамозе нашай Ксеніі Сітнік на дзіцячым «Еўрабачаньні», казаў пра яе: «Не люблю, калі дзеці крыўляюцца».

А потым — цытата з «Майго пакаленьня»:

«Набыць бы даляры,

Прадаць бы рублі,

А потым — падалей

Ад гэтай зямлі».

Вось, маўляў, да чаго заклікае гэты музыка.

І вось — мінула амаль 20 гадоў, і ўзьнік абноўлены чорны сьпіс. Там ужо ёсьць і Ксенія Сітнік, перамозе якой так радавалася калісьці Беларусь.

Усё стала на свае мейсцы.