Лічба дня. За год Статкевіча арыштоўвалі пяць разоў на 33 сутак

За што арыштоўвалі палітыка цягам гэтага года?

30 кастрычніка аднаго зь лідэраў Беларускага нацыянальнага кангрэсу Міколу Статкевіча зноў затрымалі, але жонцы дагэтуль не паведамілі, калі ён мусіць выйсьці на волю. Верагодна, палітык правядзе за кратамі 5 сутак за акцыю 8 верасьня супраць беларуска-расейскіх ваенных вучэньняў «Захад-2017».

За што яшчэ арыштоўвалі палітыка цягам гэтага года?

За марш абураных беларусаў 17 лютага Міколу Статкевіча арыштавалі на 5 сутак.

Напярэдадні Дня Волі 24 сакавіка Мікола Статкевіч быў выкрадзены і зьмешчаны ў СІЗА КДБ на трое сутак.

За дэманстрацыю бел-чырвона-белага сьцяга каля турмы на Акрэсьціна 30 сакавіка арыштавалі на 5 сутак. Для адбыцьця пакараньня ён быў затрыманы 26 жніўня непадалёк ад свайго дому.

За ўдзел у акцыі, якая праходзіла ў Менску 3 ліпеня, пакаралі арыштам на 15 сутак. Затрымалі ў Менску 22 верасьня пасьля пасяджэньня рады Беларускага нацыянальнага кангрэсу.

За ўскладаньне на Вайсковых могілках кветак савецкім салдатам 8 траўня аштрафавалі на 50 базавых (1150 рублёў).