Общество

Зміцер Панкавец, Наша ніва

Жонка Галіна засталася ў вёсцы: 5 фактаў пра новага кіраўніка Гомельшчыны Салаўя

Аляксандр Лукашэнка 29 ліпеня прызначыў Генадзя Салаўя старшынёй Гомельскага аблвыканкама. Гэта пасада была вакантнай больш за тры месяцы, калі Уладзімір Дворнік пайшоў на павышэнне і стаў віцэ-прэм’ерам па сельскай гаспадарцы.

Апошні год Генадзь Салавей з’яўляўся першым намеснікам Дворніка, таму нічога нечаканага ў гэтым прызначэнні няма. Пра новага кіраўніка Гомельшчыны зусім мала інфармацыі, таму паспрабуем запоўніць гэтыя лакуны.

Родам не з Навагрудка, а з Нясвіжа

У афіцыйнай біяграфіі Генадзь Салаўя напісана, што ён нарадзіўся ў вёсцы Тупалы Навагрудскага раёна ў 1963 годзе. Насамрэч такой вёскі нават не існуе. Ёсць Вялікія і Малыя Тупалы, але знаходзяцца яны ў суседнім Карэліцкім раёне. Адтуль паходзіла мама чыноўніка.

Калі хлопцу не было яшчэ і года, сям’я перабралася на радзіму бацькі ў Нясвіжскі раён, у вёску Качановічы. Гэта паселішча знаходзіцца ўсяго за тры з паловай кіламетры ад Нясвіжа, таму ў школу Генадзь Міхайлавіч хадзіў у райцэнтр. Ён скончыў восем класаў СШ №3 Нясвіжа, а пасля паехаў вучыцца ў Смілавіцкі сельскагаспадарчы тэхнікум.

З шматдзетнай сям’і

Бацькі старшыні Гомельскага аблвыканкама ўжо памерлі. Яны абое працавалі на калгаснай ферме. Мама была даяркай, тата — жывёлаводам. Простая вясковая сям’я. Зразумелая справа, што ад дзяцінства Генадзь Салавей быў прывучаны да фізічнай працы. Мабыць, гэта і абумовіла выбар прафесіі.

Салавей паходзіць з шматдзетнай сям’і. У бацькоў было пяцёра дзяцей. Дакладна вядома, што сястра Валянціна працягвае жыць у родных Качановічах. Недалёка жыве і сястра Тамара — у вёсцы Лявонавічы (дарэчы, гэта радзіма паэта Сяргея Новіка-Пеюна). А вось брат спадара Генадзя ўжо памёр.

Пасля сканчэння тэхнікума Салавей пайшоў працаваць заатэхнікам у калгас імя Леніна, пасля ў гаспадарку «Лань-Нясвіж». Так гаворыцца ў біяграфіі, але няхай яна не ўводзіць у зман. Справа ў тым, што гэта адна і тая ж гаспадарка, якая проста была перайменаваная. Лань, сёння аграгарадок, знаходзіцца за сем кіламетраў ад Качановіч.

Зарэкамендаваў сябе ў Клецку

На працягу шасці гадоў (2012—2018) Генадзь Салавей узначальваў Клецкі райвыканкам. «Калі чалавек стараецца, то і зямля не лянуецца», — фактычна гэтыя словы былі дэвізам ягонай працы.

Сваёй мэтай ён дэклараваў: «Зрабіць Клецкі раён камфортным для жыцця. Хочам, каб ён цешыў землякоў і здзіўляў прыезджых, каб кожны раз яны знаходзілі тут нешта новае і цікавае. Каб дагледжаныя сядзібы на добраўпарадкаваных вуліцах, сучасныя бальніца і школы, багацце кветак і зеляніны летам і мноства рознакаляровых агнёў восенню і зімой самім фактам сваёй наяўнасці пацвярджалі, што тут жывуць сапраўдныя гаспадары».

Менавіта з Клецка яго забралі на нядоўгі час пакіраваць Нясвіжскім раёнам. А Нясвіжскі раён — вядомая кузня кадраў. Напрыклад, старшынёй райвыканкама быў экс-віцэ-прэм’ер Уладзімір Дражын (так, той самы, які пісаў, што «бабла мала, мерсэдэсаў няма»), а таксама экс-старшыня Мінскага аблвыканкама Леанід Крупец.

Жонка не паехала ў Гомель

Галіна Салавей (справа). Фота Нясвіжскія навіны

Больш за дваццаць гадоў свайго працоўнага стажу Салавей якраз і аддаў гаспадарцы ў Лані. Быў там старшынёй. Мясцовыя людзі, з якімі мы размаўлялі, станоўча адгукаюцца аб ягонай працы. Нясвіжскі раён славіцца сваё урадлівай зямлёй, і гаспадарка паказвала пры Салаўю выдатныя вынікі.

Цікава, што ў «Лань-Нясвіж» працягвае працаваць жонка старшыні аблвыканкама Галіна Салавей, яна ўзначальвае мясцовы прафсаюз. Жанчына па-ранейшаму жыве ў Лані. У Гомель з мужам яна не паехала.

«У вёсцы ў нас дом, пабудаваны сваімі рукамі, дваццаць пяць сотак гароду, гаспадарка, усё гэта трэба глядзець, не ўсё так проста», — патлумачыла «НН» спадарыня Галіна.

«Спадзявалася, што вернецца, — працягвае жонка чыноўніка. — Калі шчыра сказаць, то я рада за яго, бо ён усяго дабіўся сам. Але больш бы хацела, каб ён вярнуўся сюды назад».

У вольны ад працы час Галіна Станіславаўна дома вырошчвае архідэі.

Пазнаёміліся Салаўі падчас сумеснай вучобы ў сельскагаспадарчай Акадэміі ў Горках.

Дачка працуе візажысткай

Дарына Салавей. Фота facebook.com

У сям'і дзве дачкі — Юлія і Дарына. Абедзве жывуць у Мінску.

Дарына працуе візажыстам, на яе старонцы Укантакце напісана, што выконвае паслугі ў Мінску, Нясвіжы і Клецку.

«Я дыпламаваны візажыст 4 разраду і стыліст. Скончыла аўтарскі курс візаж Дар'і Брылёвай «MakeupProfi». Павышэнне кваліфікацыі па макіяжы ў Вольгі Пякарскі. Наведваю шматлікія майстар-класы вядомых візажыстаў. Скончыла курс па прычосках ў Дыяны Голуб «Трэндавыя прычоскі». Выпускніца дома прафесійнай прыгажосці «Акадэмія стылю». Выконваю прычоскі любой складанасці. Працую з якаснай прафесійнай касметыкай», — так яна прадстаўляе сябе ў інтэрнэце. Дарыне 24 гады.

Старэйшай дачцэ Юліі 30 гадоў. Вядома, што яна скончыла БДУ ў 2012 годзе. Абедзве дачкі шмат падарожнічаюць па свеце.

Оцените статью

1 2 3 4 5

Средний балл 2.5(22)