Хто такі Дзмітрый Шаўцоў, які кіруе Беларускім Чырвоным Крыжом

Днямі Генеральны сакратар Беларускага Чырвонага Крыжа Дзмітрый Шаўцоў наведаў Данбас і з'явіўся перад камерамі з Z-сімволікай. Ён адзін з самых частых каментатараў прапаганды. «Краіна проста вырыгала гэты сцяг», — казаў Шаўцоў пра нацыяльны гістарычны сцяг.

Хто гэты чалавек?

Пачатак кар'еры

Дзмітрыю Шаўцову 49 гадоў. Дзяцінства ён правёў у Жлобіне, а пасля паступіў у Беларускі дзяржаўны медыцынскі ўніверсітэт. Падчас вучобы ён пазнаёміўся са сваёй будучай жонкай Наталляй, з якой яны разам вырашылі перавесціся ў Гомельскі медыцынскі ўніверсітэт. У іх двое дарослых сыноў.

Па размеркаванні мужчыну накіравалі ў Жлобінскую цэнтральную раённую лякарню. Першую кіраўнічую пасаду ў медыцыне ён заняў у 2000-м, стаўшы намеснікам галоўнага доктара. А ў 2005-м яго запрасілі працаваць у Мінск, у 34-ю паліклініку на вуліцы Кульман. Там ён ужо праз год стаў галоўным доктарам. У 2009-м яны з сям'ёй пабудавалі кватэру.

Шаўцоў пастаянна вучыўся: скончыў Беларускую медыцынскую акадэмію паслядыпломнай адукацыі, Акадэмію кіравання пры Лукашэнку, Інстытут дзяржслужбы.

Час у дэпутацкім крэсле

Шаўцоў стаў дэпутатам яшчэ ў Жлобіне ў 2003-м, калі быў намеснікам галоўнага доктара, матывуючы гэта тым, што дэпутату прасцей «выбіваць» грошы на свой шпіталь.

Пасля ён пайшоў у гарадскі савет дэпутатаў у Мінску, трапіў у Палату прадстаўнікоў і прабыў там два тэрміны. То-бок, быў дэпутатам агулам каля 14 гадоў. Сярод прапановаў Шаўцова — увядзенне платы за наведванне паліклінік, каб людзі не злоўжывалі іх наведваннем.

У выніку ён перайшоў на працу ў 1-ы гарадскі клінічны шпіталь у Мінску на пасаду галоўнага доктара. Ягоны тэрмін прыпаў акурат на «кавідны» час. У сваіх інтэрв'ю Шаўцоў дэклараваў, што ўсё ў парадку і пад кантролем.

Генеральным сакратаром беларускага Чырвонага крыжа ён стаў у верасні 2021-га. Таксама ён 12 гадоў узначальвае Асацыяцыю дактароў Беларусі.

Узначальваў гарадскую выбарчую камісію

На парламенцкіх выбарах у 2019-м Шаўцоў узначальваў Мінскі гарадскі выбаркам. Пасля выбараў ён заявіў, што незалежныя назіральнікі маюць слабы ўзровень падрыхтоўкі і замест назірання «піяраць сябе».

У 2020-м ён зноўку ўзначаліў Мінскі гарадскі выбаркам. Адназначна падтрымаў Лукашэнку, назваўшы 11 жніўня пратэсты «правакацыяй» і заклікаўшы пратэстоўцаў спыніцца. За падтрымку Лукашэнкі і меркаваны ўдзел у фальсіфікацыі вынікаў выбараў унесены ў санкцыйныя спісы ў Літве, Латвіі і Эстоніі.

Эксперт па ўсіх пытаннях

Увогуле, ён адзін з самых частых экспертаў для праўладных медыя. Яны звяртаюцца да яго па каментары ледзь не штодня (ужо ў 2016-м ён быў адным з рэкардсменаў дзяржаўных эфіраў). Шаўцоў выступае і як доктар, і як палітолаг. Выказваўся ён і наконт Андрэя Зельцэра, які падчас аблавы на ягоную кватэру застрэліў Дзмітрыя Федасюка з КДБ: «Сёння адбылося забойства тэрарыстам афіцэра КДБ. Правяралі кватэры па справе аб тэрарызме. У адной сапраўды такой і аказаўся. Алгарытм далейшых дзеянняў зразумелы: тэрарыстаў шкадаваць не будуць і супрацьстаянне пераходзіць на больш высокі ўзровень жорсткасці».

А вось што ён казаў пра нацыянальны бел-чырвона-белы сцяг:

«Звяртаемся да дарослага кантынгенту нашай краіны і да педагогаў. Сцяг быў бел-чырвона-белы прызнаны афіцыйна на кароткі прамежак часу да таго, калі рэферэндум і народ сказаў: «Не, прыбіраем». Ён быў. І ў вось гэты прамежак часу (з 1995 года па сёння, па 2020 год) мы разарвалі гэта паняцце.

Мы дазвалялі хадзіць нейкай маленькай жменьцы людзей, якія вечна называлі сябе БНФ, яшчэ нейкім там чынам. Так. Дзесьці там пайшлі, зніклі, потым праз год зноў яны на Дзень Волі прачнуліся. Мы гэта дазвалялі, мы не тлумачылі людзям, што гэта за сцяг.

Яго на працягу 100 гадоў краіна зрынала. У пачатку, у сярэдзіне, у канцы стагоддзя — пастаянна. Колькі можна выкідваць яго ад нас? Краіна проста вырыгала гэты сцяг у бок, і ён усё роўна падымаўся».

Адкрыта парушае статут Чырвонага Крыжа

Аднойчы Шаўцоў выказаўся наконт тэмы ЛГБТ. У эфіры дзяржканала ён назваў гэта «вычварэнствамі».

«Бо дзіця глядзіць на сям'ю. Калі ў сям'і нармальныя чалавечыя каштоўнасці, калі ў грамадстве нецярпімасць да падобнага роду вычварэнняў… Я заўсёды кажу, што гэта ўсё ж такі псіхічнае адхіленне і захворванне, таму яго трэба лячыць… Нетрадыцыйныя каштоўнасці прапагандуюцца праз мультфільмы і фільмы для падлеткаў. Гэта робіцца для знішчэння цэлых цывілізацый, краінаў, грамадстваў», — сказаў тады Шаўцоў.

Ягоныя выказванні выклікалі рэакцыю міжнароднай праваабарончай супольнасці. Так, Еўразійская кааліцыя па здароў і правах, гендарнай і сэксуальнай разнастайнасці нагадала, што Міжнародны Чырвоны Крыж пастаянна падкрэслівае ўразлівасць ЛГБТ-супольнасці.

Таксама, што такія выказванні супярэчаць асноўным прынцыпам дзейнасці таварыства, у якіх дэкларуецца павага да чалавечай годнасці ва ўсіх выпадках. Пра рэакцыю Міжнароднага Чырвонага Крыжа на заявы праваабаронцаў невядома.

Апошні раз Шаўцоў адзначыўся днямі, калі паехаў на акупаваныя тэрыторыі Украіны з гуманітарным грузам. Па легендзе расійскіх СМІ, ён «асабіста пераканаўся, што ўсе дзеці з ДНР вярнуліся дадому».

Нюанс у тым, што перад камерамі ён быў з Z-сімволікай, што таксама наўпрост забараняе статус Чырвонага Крыжа.

Нагадаем, Беларускі Чырвоны Крыж — цалкам праўладная арганізацыя. Яе сябры часта ўдзельнічаюць у выбарчых камісіях. Чырвоны Крыж не наведваў палітвязняў у калоніях, хоць мае такую магчымасць — прадстаўніца таварыства Іна Лемяшэўская ўваходзіць у склад Рэспубліканскай грамадскай назіральнай камісіі пры Міністэрстве юстыцыі.