«Выйшаў з акна 10 паверха п`яны і ў адных шкарпэтках»
У мінулым месяцы з дзясятага паверха мінскай гасцініцы «Юбілейная» зваліўся амерыканец Кайл Тэйфэл (Tafel).
Прыехаў на чэмпіянат разам з цёткамі
З 14 па 25 чэрвеня ў Мінску праходзіў чэмпіянат свету па класічным паўэрліфцінгу. У ім прынялі ўдзел прадстаўнікі 52 краін, у тым і амерыканцы. Амерыканская зборная была раселеная па чатырох гатэлях: «Беларусь», «Хілтан», «Планета», «Юбілейная».
67-гадовая Дэніс Томас, ветэран-спартовец, адна з трэнераў каманды, прыехала загадзя. Яна жыла ў «Юбілейнай». Разам з ёй прыехаў пляменнік — 36-гадовы вайсковец Кайл Тэйфэл і яе сястра, другая цётка Кайла.
Кайл Тэйфэл членам спартовай дэлегацыі не быў. Прадстаўнікі беларускай федэрацыі паўэрліфтынгу кажуць пра яго: «Быў там малады хлопец, фанат, прыехаў падтрымаць зборную».
Маёр Нацгвардыі Тэйфэл разам з дзвюма цёткамі засяліўся ў нумар на 10 паверсе. У адным пакоі жыў ён, другі займалі жанчыны.
Кайл з цёткамі. Злева — Дэніс Томас
Кайл з цёткамі засяліліся ў гатэль 12 чэрвеня. Уначы таго ж дня ў «Юбілейнай» здарылася трагедыя. Кайла Тэйфэла знайшлі мёртвым каля гатэля.
Начныя прыгоды амерыканца
Адзін з тых, хто быў там ноччу, распавёў «Нашай Ніве» падрабязнасці.
— Былі сур’ёзныя разбіральніцтвы: прыехалі міліцыянты, прыехалі арганізатары чэмпіяната з Беларускай федэрацыі паўэрліфтынгу. Амерыканец жа!
Казалі, што амерыканец быў у казіно, прычым моцна нападпітку. Напіўся так, што ахоўнікі яго вывелі — прычым нават пад рукі адвялі ў нумар, ён ужо кепска хадзіў. Але праз нейкі час гэты амерыканец адчыніў акно ў сваім нумары і выйшаў на вузкі парапет звонку будынку. Ён шпацыраваў па ім на ўзроўні дзясятага паверха ў адных шкарпэтках. Ці хацеў кудысьці пералезці, ці што — невядома. Ну і вось…
Гэта ж пацвердзіў і начальнік службы аховы гасцініцы «Юбілейнай» Леанід Гвоздзь: «Так, хутчэй за ўсё ён там хадзіў у шкарпэтках. Камер звонку будынка няма, але мы бачылі сляды».
Па словах бацькі Тэйфэла, Кайл у тую ноч паведаміў цёткам, што ахоўнікі «прагнуць крыві», таму Кайл спужаўся і забарыкадзіраваў дзверы знутры.
Гэтую версію ахова гатэля выключае.
— Канфлікту з ахоўнікамі не было аніякага. Так, яго адвялі ў нумар. Але ўсё было ціха і спакойна. У гэтым жа нумары ў суседнім пакоі былі сваячкі мужчыны, дык калі ён выйшаў у вакно, то яны нават не прачнуліся, — кажа Гвоздзь. — Калі мы зайшлі да іх у нумар, жанчыны здзівіліся: «А што ён, не спіць? Ён жа спаў.
І пасля ў яго цётак не было аніякіх прэтэзій ані да адміністрацыі гатэля, ані да аховы.
Ды і міліцыя разбіралася, забірала відэа з залаў гатэля, тут былі прадстаўнікі консульства, усё рабілася ў іх прысутнасці. Немагчыма было б штосьці схаваць ці прыўкрасіць».
Бацька ж Кайла з беларускімі ўладамі не кантактаваў. Ён паведаміў амерыканскім журналістам, што «не задаваў пытанняў і не спадзяецца на адказы, бо гэта ўсё адно не верне яго сына».
Читайте еще
Избранное