Віктар Марціновіч: што будзе замест рэформаў

Пісьменнік Віктар Марціновіч тлумачыць, чаму спадзяванні на эканамічную лібералізацыю, якую прагназуюць некаторыя аналітыкі ў выніку канфлікту з Расіяй, дарэмныя.  

Фота Рамана Чмяля, Бінокль

У сваёй калонцы на Budzma.by Марціновіч адзначае:

«Навошта патрэбныя рэформы, калі вонкавых грошай не стае? Маю на ўвазе, у здаровых краінах.

Каб навучыць сістэму жыць на меншым бюджэце. Каб прыцягваць інвестыцыі.

Пагадзіцеся, гэта не наша схема.

Наша схема — яшчэ люцейшая вайна з дармаедамі. Каб за камуналку аддавалі ўтрая больш. Нарады з патрабаваннем «здабыць з-пад зямлі». «Барацьба з карупцыяй» — быццам, карупцыя магчымая тут, у настолькі празрыстай сістэме, без узгадненняў з тымі, хто ваюе.

Пры дэфіцыце вонкавых грошай крыніцай паступлення ў бюджэт робяцца грамадзяне.

Мы з вамі.

То я б чакаў, што ўсе незабудаваныя дзіцячыя пляцоўкі, школьныя стадыёны, заказнікі і ўрочышчы будуць канчаткова «ўшчыльненыя». Бо вы ж будзеце набываць гэтыя кватэры.

За грошы.

Я б чакаў, што падаткі стануць яшчэ цікавейшымі. Што бензін хутка пачне даражэць не па капейцы за тыдзень. Вось гэта наша логіка.

І я, дарэчы, не ведаю, што б сам прапанаваў на іхным месцы. Бо часы простых рашэнняў прайшлі. Рэформы трэба было рабіць замест «Дажынак» і лядовых палацаў».

Оцени статью:
1
2
3
4
5
Средний балл - 5 (оценок:58)