Суд аштрафаваў актывіста за ўдзел у Дні памяці паўстанцаў Каліноўскага

Юрый Глебік пакараны штрафам у 25 базавых велічынь.

19 лістапада Свіслацкі раённы суд аштрафаваў грамадскага актывіста Юрыя Глебіка на 25 базавых велічынь за ўдзел у традыцыйным Дні памяці паўстанцаў 1863 года, які прайшоў 31 кастрычніка ў Свіслачы і Якушоўцы.

Разглядаў адміністрацыйную справу старшыня Свіслацкага суду Аляксандр Шылін, які ў ранейшыя гады – у 2012-м і 2014-м – ужо засуджваў грамадскіх актывістаў да адміністрацыйнага арышту і штрафаў, паведамляе праваабарончы сайт «Вясна».

Пратакол пра адміністрацыйнае правапарушэнне быў складзены супрацоўнікам Свіслацкага РАУС маёрам Андрэем Болбатам.

На у якасці сведак выступілі свіслацкія міліцыянты Аляксандр Барэль і Аляксандр Гуштын, таксама праглядалася відэа з мерапрыемства.

Суддзя Шылін палічыў Глебіка вінаватым у парушэнні парадку арганізацыі ці правядзення масавага мерапрыемства і пакараў яго штрафам.

Юрый Глебік збіраецца абскардзіць гэтае рашэнне ў Гродзенскім абласным судзе.

Год таму свіслацкі актывіст за ўдзел у Дні памяці быў пакараны штрафам у 10 б.в.

Акрамя Юрыя Глебіка пратаколы за удзел у акцыі 31 кастрычніка былі складеныя на гродзенцаў Віктара Сазонава, Уладзіміра Хільмановіча і Эдварда Дмухоўскага. Як паведамляе spring96.org, у пратаколах, складзеных на Сазонава і Дмухоўскага, была пазначана, што яны ўдзельнічалі ў мерапрыеістве ў Якушоўцы, хоць у той дзень актывісты былі толькі ў Свіслачы.

Нагадаем, 31 кастрычніка (Гродзенская вобласць) прайшла акцыя памяці паўстанцаў Каліноўскага. Арганізатарамі выступілі Партыя БНФ і свіслацкія актывісты Партыі «Беларуская сацыял-дэмакратычная Грамада». У акцыі ўдзельнічалі каля ста чалавек.