Шведскія палітыкі заклікаюць афіцыйна ўжываць слова Belarus

З адпаведным заклікам да швэдзкага ўраду і грамадзтва зьвярнулася Швэдзкая народная партыя — лібэралы. Як гаворыцца ў заяве, падрыхтаванай актывісткай партыі, адказнай за пытаньні вонкавай палітыкі, Біргіты Ольсан, “надышоў час зьмяніць назву апошняй эўрапейскай дыктатуры. Па-швэдзку яна звыкла завецца Vitryssland, а не Belarus.

Узьнікае пытаньне: як мы можам разглядаць праблемы дэмакратычнай Беларусі, калі нават мала хто са швэдаў ведае, што такая краіна існуе, калі многія проста лічаць яе часткай Расеі?“

Гэтае пытаньне Біргіта Ольсан задае перадусім кіраўніцтву швэдзкага МЗС і швэдзкага радыё. У першым выпадку размова ідзе пра тое, каб афіцыйна замяніць назву Vitryssland на Belarus. У другім выпадку пытаньне зьвязана з рашэньнем кіраўніцтва SR International спыніць беларускамоўнае вяшчаньне і надалей рабіць перадачы для беларускай аўдыторыі па-расейску.

Як гаворыцца ў заяве Біргіты Ольсан, “тым часам як швэдзкі ўрад выступае за падтрымку дэмакратыі ў Беларусі, швэдзкае радыё, як відаць, дзейнічае насуперак ураду. Ад 1 верасьня SR International, якое перадае людзям у Эўропе свае дэмакратычныя праграмы, спыняе вяшчаньне на беларускай мове. Няўжо, паводле кіраўніцтва SR, вяшчаньне па-расейску можа выканаць сваю місію для тых, чыя матчына мова — беларуская? Аднак расейская мова, якая дамінавала ў Беларусі ў савецкія часы, для многіх беларусаў зусім не асацыюецца з дэмакратыяй”, — лічыць швэдзкі палітык Біргіта Ольсан.