Радыё Свабода
Штаб Мiлiнкевiча не прыняў паРАДУ

Падчас нечарговага сходу Рады беларускай інтэлігенцыі яго ўдзельнікі выказаліся за тое, каб прэтэндэнты на ўдзел у прэзыдэнцкіх выбарах Аляксандар Мілінкевіч і Аляксандар Казулін зьнялі свае кандыдатуры, тым самым патрабуючы правядзеньня справядлівых і дэмакратычных выбараў. На думку сябраў Рады, удзел абодвух прэтэндэнтаў у выбарчай кампаніі толькі надасьць легітымнасьць афіцыйным вынікам галасавання.

Як на рэкамэндацыі Рады беларускай інтэлігенцыі адрэагавалі ў штабох Аляксандра Мілінкевіча і Аляксандра Казуліна? Учора Мілінкевіч сам прысутнічаў на паседжаньні і прыняў рэкамэндацыі “да ведама”. Аднак сёньня Аляксандар Бухвостаў, кіраўнік ініцыятыўнай групы Мілінкевіча, заявіў: ніякіх “сыходаў” ня будзе.

(Бухвостаў:) “Ніякіх падобных прапановаў мы прымаць не зьбіраемся. У нас ёсьць адназначнае рашэньне: Мілінкевіч ідзе да канца, і ніякіх рашэньняў аб байкоце, аб зьняцьці не прымалася ні ў штабе, ні на Палітрадзе”.

(Карэспандэнт:) “Іншымі словамі, рэкамэндацыі ўлічвацца ня будуць?”

(Бухвостаў:) “Рэкамэндацыі могуць быць улічаныя ў выпадку новай палітычнай сытуацыі, калі будзе неабходнасьць правесьці нейкую дэманстрацыю. Але пакуль такой неабходнасьці няма, і Палітрада такія пытаньні наўрад ці бліжэйшым часам будзе разглядаць”.

А вось Аляксандар Казулін, які ў чарговай замежнай паездцы, пра парады інтэлігентаў яшчэ нічога ня ведае. Гаворыць сябра каманды Аляксей Кароль:

(Кароль:) “Казуліна ў Беларусі няма, таму ён пра гэта і ня ведае. І, шчыра кажучы, я гэтага варыянту цяпер не абмяркоўваў бы, каб не даваць ніякіх намёкаў уладам да рэгістрацыі. Я і ўчора казаў: добра, што шмат варыянтаў гучала”.

Наступны сход Рады беларускай інтэлігенцыі мяркуецца правесьці 21 лютага, пасьля абвяшчэньня Цэнтравыбаркамам вынікаў рэгістрацыі кандыдатаў на выбарах прэзыдэнта Беларусі.

Оцени статью:
1
2
3
4
5
Средний балл - 0 (оценок:0)