"Нешта падобнае назіралася падчас апошняга рэфэрэндуму Хусэйна"
Бліц-экспэртыза "Свабоды". Папярэднія высновы апошняга дня выбарчай кампаніі робяць нашыя аглядальнікі: зь Менску — Валер Карбалевіч, з Прагі — Юры Дракахруст.
(Дракахруст:) "Валер, да завяршэньня галасаваньня
засталося яшчэ паўтары гадзіны, аднак на якія асаблівасьці сёньняшняга
волевыяўленьня Вы б зьвярнулі ўвагу?"
(Карбалевіч:) "Калі казаць пра асаблівасьці хады
выбарчай кампаніі, то можна канстатаваць, што цяпер адбылося нечакана больш
моцнае супрацьстаяньне ўлады і апазыцыі ва ўмовах больш жорсткага палітычнага
рэжыму, які сфармаваны ў Беларусі.
Часам стваралася ўражаньне, што гэта сапраўднае змаганьне за
ўладу, а ня толькі імітацыя, як гэта звычайна адбываецца ў Беларусі.
Аднаго кандыдата ў прэзыдэнты білі, распачыналі крымінальную
справу, КДБ "раскрыла" змову і падрыхтоўку тэракту.
Мы ўбачылі несхаваны страх уладаў перад рэвалюцыяй. І гэты
страх кіраваў шмат якімі дзеяньнямі праваахоўных органаў. Тут і масавыя
затрыманьні актывістаў апазыцыі, і імкненьне запужаць патэнцыйных удзельнікаў
акцый пратэсту і інш.
А ўсё астатняе, як звычайна: 30% выбаршчыкаў, якія прагаласавалі
датэрмінова; экзыт-пол “Экоома”, які больш нагадвае піяр на карысьць Лукашэнкі;
агітацыя за стабільнасьць (чытай за Лукашэнку) падчас тэлерэпартажу з выбарчых
участкаў".
(Вядучы:) "Юры, а што Вам падалося важным і адметным у
сёньняшнім галасаваньні?"
(Дракахруст:) "Зараз і для ўлады і для апазыцыі мае
значэньне толькі тое, што адбудзецца пасьля. Некалькі момантаў: першае —
неверагодная яўка на папярэдняе галасаваньне 31%, з кожным галасаваньнем гэтая
лічба расьце — на выбарах 2001 году было 14%, на рэфэрэндуме 2004 году — 17%,
зараз амаль траціна. Чым больш тых, хто прагаласаваў датэрмінова — тым больш
магчымасьцяў фальсыфікацыі.
Другое — экзыт-полы. Мы атрымалі заяву Балтыйскага
аддзяленьня Гэлапа, адмыслоўцы гэтага цэнтра заяўляюць, што правядзеньне
навукова абгрунтаванага экзыт-полу ў Беларусі гэтым разам немагчыма. У заяве
адзначаецца абсалютная некампэтэнтнасьць тых цэнтраў, якія праводзяць
экзыт-полы і дадзеныя якіх агучваюцца па БТ задоўга да завяршэньня
галасаваньня.
Зьмест гэтых дадзеных — яшчэ адна асаблівасьць. Хутчэй за
ўсё прыкладна такімі ж будуць і канчатковыя дадзеныя ЦВК. Паводле іх
апазыцыйныя кандыдаты набіраюць лічаныя адсоткі, на другім месцы — Гайдукевіч.
У 2001 годзе паводле афіцыйных зьвестак Ганчарык набраў 15%, зараз паводле
экзыт-полаў — за Мілінкевіча 3%.
Яшчэ адна асаблівасьць — затрыманьні актывістаў і ператрусы
працягваюцца ў дзень галасаваньня.
Усе гэта разам сьведчыць пра тое, што ў Беларусі адбываецца
што заўгодна, але толькі ня выбары. Суадносіны рэйтынгаў кандыдатаў ня маюць
аніякага значэньня".
(Вядучы:) "Нагадаю, галасаваньне завершыцца праз
паўтары гадзіны. Як можна ахарактарызаваць грамадзкія настроі, якія панавалі і
пануюць у Беларусі ў гэтыя гадзіны? Ці шмат людзей гатовыя рабіць нешта
большае, чым пайсьці прагаласаваць? Валер, як гэта бачыцца Вам?"
(Карбалевіч:) Цікава. што мне сёньня тэлефанавалі з-за мяжы
і пыталіся, ці будзе рэвалюцыя. Яны казалі, што калі чытаць інфармацыю на
інтэрнэт-сайтах пра беларускія выбары, то ўзьнікае адчуваньне, што Беларусь
знаходзіцца напярэдадні рэвалюцыі.
Насамрэч, атмасфэра ў Менску спакойная і зусім не
рэвалюцыйная. Стварэньню такога ўражаньня у замежнікаў вельмі дапамаглі
беларускія ўлады. Афіцыйныя асобы Беларусі, у тым ліку Лукашэнка, старшыня КДБ
Сухарэнка, а таксама дзяржаўныя мэдыі рэтрансьлявалі і павялічылі заклікі
апазыцыі выйсьці на вуліцу. І цяпер, дзякуючы ўладам, амаль кожны чалавек у
Беларусі ведае, што ў Менску магчымыя нейкія ўзрушэньні.
Магчыма, улады і запужалі пэўную частку патэнцыйных
удзельнікаў пратэсту, простых абыватэляў, але адначасова разбурылі міт аб
стабільнасьці ў краіне. Улады моцна спужаліся самі і запужалі грамадзтва. І
цяпер замест чарговага руціннага перавыбраньня Лукашэнкі ў шэраговага
выбаршчыка прэзыдэнцкія выбары будуць асацыявацца з чаканьнем нейкага
катаклізму".
(Вядучы:) "Юры, на Ваш погляд, чым цяперашнія выбары
адрозьніваюцца ад папярэдніх 2001 году і ад апошняга галасаваньня на
парлямэнцкіх выбарах і рэфэрэндуме ў 2004 годзе?"
(Дракахруст:) "Улада ставіць на мэце не перамагчы ў
электаральным спаборніцтве, а цалкам зьнішчыць апазыцыю — па меншай меры
палітычна і маральна.
Адсюль і фантастычныя вынікі экзыт-полаў, якія насуперак
закону агучваюцца па тэлебачаньні і паток пагрозаў, які не спыняецца і сёньня.
Гледзячы па ўсім, улады разьвіталіся з думкай, што вынікі
галасаваньня будуць хоць у якой форме прызнаныя міжнароднай супольнасьцю. Мэтай
робіцца дэманстрацыя маналітнасьці, менавіта пра маналітнасьць казаў сёньня
Аляксандар Лукашэнка на выбарчым участку.
Нешта падобнае назіралася падчас апошняга рэфэрэндуму Садама Хусэйна, калі ў галасаваньні ўзялі ўдзел 100% грамадзянаў і кожны зь іх прагаласаваў “за”".
Оцените статью
1 2 3 4 5Читайте еще
Избранное