Лица

«Мы вернемся. Слухайце нашую музыку». Што пішуць з няволі музыкі гурту Irdorath

Лідэры фэнтэзі-фольк-гурту Irdorath Уладзімер і Надзея Калач напісалі першыя лісты сваякам. Яны перажываюць за сваіх гадаванцаў Мішку і Платву, расказваюць пра шчасьлівыя моманты ў турме і просяць слухаць іхную музыку. Падрабязнасці на Радыё Свабода.

2 жніўня 2021 году музыкаў фэнтэзі-фольк-гурту Irdorath затрымалі са стралянінай на лецішчы пад Менскам. Шасьцёх затрыманых падазраюць у «арганізацыі дзеяньняў, якія груба парушаюць грамадзкі парадак, ці ўдзеле ў іх» — за выступы падчас масавых пратэставых шэсьцяў у Менску ў жніўні 2020 году.

Уладзімер плянуе чытаць па-нямецку, чакае лістоў

Уладзімер і Надзея Калачы — муж і жонка. Родная сястра Ўладзімера Валянціна расказала, пра што музыкі напісалі сям’і ў першых лістах з-за кратаў.

«Спрашиваете, как мы живем. Болью. Любовью. Надеждой». Про группу Irdorath, чьи участники стали политзаключенными

Першыя два лісты, якія прыйшлі ад Уладзімера, датаваныя 15 і 19 жніўня.

— Вова піша, што перажыў сапраўдны шок ад таго, што адбылося, але паціху прывыкае да гэтага новага жыцьця, — кажа сястра музыканта.

Доўгі час мужчына вінаваціў сябе ў тым, што сяброў затрымалі на дні нараджэньня жонкі, асабліва хваляваўся за саму Надзею. Адаптавацца да турмы яму дапамаглі сукамэрнікі, супакойваюць яго і ўсяляк дапамагаюць. Стан здароўя дудара добры.

— Першае, што зрабіў, напісаў на кубку Irdorath, і выявілася, што нават у камэры ёсьць людзі, якія нас ведаюць і паважаюць, а адзін нават захапляецца тым, што мы робім, — напісаў у лісьце Ўладзімер.

На «Валадарцы» на музыку найбольшае ўражаньне зрабіла першая прагулка: неба, сонца, паветра і некалькі травінак на цэгле. Вязень замовіў кнігі на нямецкай мове ў бібліятэцы і плянуе чытаць.

— Калі вялі калідорам, ён бачыў Надзю і Юлю, і Пятра з Антонам (іншыя удзельнікі гурту. — РС), здолелі нават сустрэцца позіркамі. Гэта быў самы шчасьлівы момант, — пераказвае Валянціна.

Лісты пакуль яму прыходзяць толькі ад маці. Ён вельмі чакае пасланьняў з волі.

Надзея: «Абдыміце адно аднога за нас»

Надзея Калач напісала ліст 22 жніўня. Першае, што кідаецца ў вочы на ім, — гэта партрэт мужа Ўладзімера. Жанчына напісала ліст, найперш каб супакоіць сваякоў, што ўсе ўмовы становяцца цярпімымі і яна ў бясьпецы.

Партрэт Уладзімера Калача, які яго жонка Надзея намалявала ў СІЗА

— Яна вельмі перажывае, што гэтая сытуацыя прынесла вельмі вялікі стрэс нам, нашай вялікай сям’і (у сям’і Калачоў 4 браты і сястра, Уладзімер адзін зь іх. — РС), бо ведае, якія мы заўжды згуртаваныя, як мы перажываем, — перадае Валянціна.

Надзея піша, што не зьбіраецца «раскісаць». Кажа, што ў турме добрая бібліятэка, плянуе чытаць. Лістоў яна пакуль не атрымлівала, таму вельмі іх чакае.

Сужэнцы хвалююцца за сваіх гадаванцаў сабаку Мішку і котку Платву, якіх цяпер глядзяць сваякі. Дзяцей у сям’і пакуль няма.

— Што бы ні здарылася, у будучыні мы вернемся. І нашая любоў адно да аднога, да вас, да мастацтва, да нашых хлопцаў, да сяброў, да жыцьця нікуды не падзенецца. Абдыміце адно аднога за нас. Ну і слухайце часам нашую музыку, хай яна жыве звонку, — напісала Надзея.

Оцените статью

1 2 3 4 5

Средний балл 5(8)