Лябедзька прапанаваў правесці праверку фінансаў, якія Еўропа выдзяляе беларускай апазіцыі

Старшыня Аб'яднанай грамадзянскай партыі Анатоль Лябедзька прапанаваў правесці аўдытарскую праверку дапамогі, якую выдзяляюць дэмакратычныя краіны на падтрымку грамадзянскай супольнасці ў Беларусі.

Беларускі палітык выступіў з гэтай прапановай у час паседжання рабочай групы па Беларусі Парламенцкай асамблеі праграмы ЕЗ «Усходняе партнерства» Еўранэст.

— Была вельмі добрая дыскусія, прысвечаная медыям. Мы выступілі з прапановай, як найлепш падтрымаць медыі Беларусі. Я сказаў, што калі Аляксандр Лукашэнка гаворыць, што палітычная апазіцыя і грамадзянская супольнасць атрымоўваюць сотні мільенаў даляраў, то гэта выклікае ў мяне ўсмешку. Але калі чыноўнікі ў Бруселі гавораць, што падтрымка грамадзянскай супольнасці і палітычнай апазіцыі ў Беларусі ўзрасла ўдвая, то ў мяне здзіўленне. Я не разумею, пра што ідзе размова. Я прапанаваў: давайце мы зробім аўдыт той дапамогі, якая ідзе ў Беларусь.

Паводле Анатоля Лябедзькі, есць незалежныя медыі, есць праваабаронцы, есць палітычныя структуры, якія, вобразна кажучы, знаходзяцца на лініі фронта. Але ствараюцца і нейкія псеўда-дэмакратычныя арганізацыі. Прапанова палітыка была падтрыманая дэпутатамі Еўранэсту. Таму наступнае паседжанне працоўнай групы па Беларусі будзе прысвечана вывучэнню эфектыўнасці дапамогі.