Лічба дня. За чатыры з паловай гадзіны Маляванычу сабралі 3 000 еўра

Агулам па стане на 21.50 22 кастрычніка Маляванычу (акцёр Аляксандр Ждановіч) ахвяравалі 3 714 €.

Кіраўнік фонда BYSOL Андрэй Стрыжак падзякаваў нераўнадушным за  салідарнасць і падтрымку. «Яна мацней за махляроў і беды на жыццёвым шляху», напісаў ён.

Як Маляваныч стаў ахвярай махляроў, ён распавёў на старонцы фонда.

18 кастрычніка Аляксандр павінен быў ладзіць вечар Батлейкі ў варшаўскім Беларускім моладзевым хабе. Перад самым выступам яму патэлефанавалі «супрацоўнікі банка» і паведамілі трывожную навіну — нібыта была спроба зняць сродкі з ягонага рахунку. Каб абараніць грошы, Аляксандру трэба было тэрмінова прадставіць асабістыя дадзеныя. У выніку доступ да банкінгу аказаўся заблакаваны, а сродкі выкрадзеныя.

Таксама BYSOL аб’явіў збор былому палітвязню, якому патрабуецца дапамога на перыяд рэабілітацыі пасля аперацыі. Мінчанін адсядзеў два гады за каментар у дачыненні да прадстаўнікоў улады і, каб пазбегнуць паўторнага арышту, з'ехаў. Паўгады таму ён пераехаў у Літву.

Дапамога патрабуецца яшчэ аднаму былому палітзняволенаму Арцёму Мядзведскаму. Пасля адбыцця тэрміну ён эвакуяваўся ў Польшчу, і яму патрэбна арандаваць жыллё, купіць абутак, адзенне і заняцца здароўем.