Конвейер репрессий. Денис Ивашин стал победителем литературной премии. В Минске начинают судить журналистку Ольгу Родионову

Дзяніс Івашын стаў пераможцам літаратурнай прэміі

Рада Беларускага ПЭНа назвала пераможцаў і лаўрэатаў прэміі імя Францішка Аляхновіча за найлепшы твор, напісаны ў зняволенні, паведамляе БАЖ. Сярод пераможцаў — журналіст Дзяніс Івашын.

Нагадаем, што 14 верасня 2022-га ў Гродзенскім абласным суде Дзяніса Івашына прызналі вінаватым паводле двух артыкулаў Крымінальнага кодэкса: ч. 1 арт. 356 КК (здрада дзяржаве) і арт. 179 КК (незаконны збор і распаўсюд звестак аб прыватным жыцці).

Суддзя Валерый Раманоўскі прысудзіў журналіста да пазбаўлення волі на 13 гадоў і 1 месяц у калоніі ва ўмовах узмоцненага рэжыму і штрафу ў памеры 4800 рублёў.

У Мінску пачынаюць судзіць журналістку Вольгу Радзівонаву

Разгляд крымінальнай справы пачаўся раніцай 16 лістапада ў Мінскім гарадскім судзе, паведамляе БАЖ. Вольгу Радзівонаву  вінавацяць паводле чатырох крымінальных артыкулаў дыфамацыйнага характару.

Ёй пагражае да 6 гадоў абмежавання ці пазбаўлення волі. Весці працэс будзе суддзя Вера Галаўкова.

Вольгу Радзівонаву абвінавачваюць паводле наступных артыкулаў Крымінальнага кодэкса РБ:

• ч. 1 і 2 арт. 367 «Паклёп у дачыненні да прэзідэнта Рэспублікі Беларусь» — караецца абмежаваннем волі на тэрмін да 5 гадоў ці пазбаўленнем волі на тэрмін да 6 гадоў;
• арт. 369–1 «Дыскрэдытацыя Рэспублікі Беларусь» — караецца арыштам ці абмежаваннем волі на тэрмін да 4 гадоў, ці пазбаўленнем волі на той жа тэрмін са штрафам або без штрафу;
• ч. 1 арт. 130 «Распальванне расавай, нацыянальнай, рэлігійнай альбо іншай сацыяльнай варожасці або варажнечы» — караецца штрафам, або арыштам, або абмежаваннем волі на тэрмін да 5 гадоў, або пазбаўленнем волі на той жа тэрмін;
• ч. 1 арт. 368 «Абраза прэзідэнта Рэспублікі Беларусь» — караецца штрафам, або папраўчымі працамі на тэрмін да 2 гадоў, або арыштам, або абмежаваннем волі на тэрмін да 4 гадоў, або пазбаўленнем волі на той жа тэрмін.

Журналістку Вольгу Радзівонаву затрымалі 7 сакавіка 2024 года. Вядома, што падчас утрымання ў СІЗА № 1 яе накіроўвалі на псіхіятрычную экспертызу ў лякарню ў Навінках.

Хворая маці Вольгі Радзівонавай, якой больш за 80 гадоў, мае патрэбу ў пастаянным доглядзе.

30 кастрычніка 2024 года праваабарончая супольнасць прызнала Вольгу Радзівонаву палітычнай зняволенай.