Кнігі пра Беларускае Адраджэнне
Навале маскоўскай макулатуры, татальнай русіфікацыі кнігадруку ў нашай краіне супрацьстаяць беларускія аўтары, якія ствараюць беларускія кнігі ў замежжы. У 2007 годзе вышлі ў свет дзве чарговыя кнігі Зянона Пазьняка, а таксама кніга Галіны Пазьняк.
“Дарога” — новая кніга паэта і фотамастака Зянона. Нізка фотаздымкаў
адлюстроўвае краявіды беларускай зямлі, помнікі архітэктуры Вільні. Яны часам камэрныя,
часам дыхаюць прасторай і веліччу.
Глыбокая філасофія вершаў і фотакарцін Зянона даступная кожнаму чалавеку, у якога жывая душа і шчырае
сэрца. Тонкай лірыкай прасякнуты вершы пра каханьне, родны край, чалавечы лёс
("Наша зямля", "Настальгія", цыкл "От добра").
Пафас барацьбы за Айчыну, нацыянальнай гісторыі гучыць у вершах “Белы рыцар”,
“Прадвызначэнне”, “Вечны вобраз”.
Асобная глава выданьня — гэта вершы і фота, прысвечаныя Амерыцы. Аўтар
глядзіць на чужыну праз прызму беларускай душы. Кур’ёзныя ўражанні і яркія
перажыванні пераплятаюцца ў радках і фотавобразах небеларускага жыцця. Беларусь
для Зянона — “У сьвеце чужым / Толькі адна апора, крыніца цяпла…”
Кніга “Развагі” Зянона Пазьняка мае падтытул “Канцэпцыя новага Беларускага
Адраджэньня. Кн. 1, артыкулы і матэр’ялы (1990 — ІІІ. 1996)”. Сам аўтар вызначае
ў прадмове галоўную задачу выдання: “Адлюстраваць сутнасць палітычнага
становішча і канцэпцыю дзеянняў Беларускага нацыянальнага Адраджэння,
канцэпцыю, якая прывяла да перамогі — здабыцця незалежнасці Беларусі”.
Кніга прадстаўляе артыкулы Зянона Пазьняка і інтэрвію з ім, надрукаваныя ў
беларускім друку на працягу змагарных шасьці гадоў. У гэтых тэкстах адчуваецца
жывы пульс падзеяў, сфармуляваны адэкватныя высновы і прагнозы, якія зьдзейсніліся
праз пэўны час.
Сабранае разам, гэта больш чым публіцыстыка ў звычайным сэнсе слова. Гэта
хутчэй энцыклапедыя Беларускага Адраджэння, на старонках якой разгарнуліся
драматычныя падзеі нашай эпохі. Удзельнікі тых падзеяў многае ўспомняць,
знойдуць сваё месца ў плыні адлюстраваных фактаў. Для маладых гэтая кніга ёсьць
сапраўды непаўторны гістарычны матэр’ял дзеля асэнсаваньня часу, у якім яны не
жылі. Аўтар зрабіў вялікую працу па збору і сістэматызацыі матэр’ялу. Кніга мае
высокае навуковае значэнне.
Выданне ілюстравана выдатным дакумэнтальным і мастацкім фотаматэр’ялам.
Некаторыя з фотаздымкаў публікаваліся ў тыя часы. Але многія апублікаваны
ўпершыню. Шматтысячныя дэманстрацыі і мужны супраціў самотнага беларуса,
партрэты паплечнікаў, плакаты з вельмі вострымі тэкстоўкамі ў руках
дэманстрантаў, і самае галоўнае — яркі кантраст паміж светлымі тварамі
змагароў-адраджэнцаў і дзікімі партрэтамі ненавіснікаў Беларусі. Гэтае
супрацьстаяньне і дагэтуль вызначае сэнс сучаснае беларускае гісторыі.
“Беларусь у сэрцы” — аўтабіяграфічная кніга Галіны Пазьняк. Але па волі
лёсу біяграфія аўтаркі сталася часткай біяграфіі нашай краіны. Знаходзячыся ў
цэнтры барацьбы за незалежнасць
Беларусі, Галіна Пазьняк занатавала і апублікавала цяпер шэраг фактаў і
падзеяў, якія без яе памяці і яе пяра забыліся б і яшчэ горш, сталіся б аб’ектам для фальсіфікацыяў і
прыдумак (што мы, на жаль, назіраем цяпер у “мемуарах” некаторых дзеячаў, роля
якіх у нацыянальным Адраджэнні была мягка кажучы сумніўнай).
Мова кнігі жывая і сакавітая, чытаецца на адным дыханні. Аўтарка перадае
настрой, фарбы падзеяў, прадстаўляе чытачу праўдзівыя карціны часу. Вось,
напрыклад, старонка, прысвечаная 100-тысячнаму мітынгу 26 лютага
Тры кнігі пра нацыянальнае Адраджэнне — надзвычай важны ўнёсак у беларускі
кнігадрук на працягу ўсяго аднаго года. Цяпер і праз дзесяцігоддзі яны
абавязкава знойдуць свайго чытача.
Зянон. Дарога. (Вершы і
фатаграфіі). Варшава-Вільня, "Беларускія Ведамасьці”, Таварыства
Беларускай Культуры ў Летуве, 2007 — 430 ст., іл.
Зянон Пазьняк. Развагі.
Канцэпцыя новага Беларускага Адраджэньня. Кн. 1, артыкулы і матэр’ялы (1990 —
ІІІ. 1996). Варшава-Нью Ёрк-Вільня, “Беларускія Ведамасьці”, Таварыства
Беларускай Культуры ў Летуве, 2007 — 312 ст., іл.
Галіна Пазьняк. Беларусь у
сэрцы. Варшава-Нью Ёрк-Вільня, “Беларускія Ведамасьці”, Таварыства Беларускай
Культуры ў Летуве, 2007 — 240 ст, іл.
Оцените статью
1 2 3 4 5Читайте еще
Избранное