Клікалі Дзеда Мароза – прыйшоў Вольскі (фота)

25 жніўня тэрыторыю “Дудутак” атакавалі аматары беларускай кухні, народных танцаў і шматлікія фанаты “Крамбамбулі”. У гэты дзень музейны комплекс “Дудуткі” праводзіў фэст “Млын”.

Пачалося мерапремства з малебну з асвячэннем дароў беларускай зямлі. Пра тое, што лета на сыходзе, напаміналі і снапы ўздоўж дарожак.

Паказальнае выступленне коннай школы сабрала шмат юных гледачоў. Пакатацца на конях змаглі і ўсе жадаючыя.

А майстар-клас па народных танцах ад вандроўнага тэатра "Гістрыён" прыйшоўся даспадобы моладзі. Хлопцы і дзяўчыты заліхвацкі танчылі польку і гапак, нібыта рабілі гэта кожны дзень.

Тыя ж, хто спавядае не асабліва спартыўны лад жыцця, налягалі на народныя стравы. У гэты дзень усе ахвотныя маглі атрымаць майстар-клас ад гісторыка беларускай кухні Алеся Белага.

Трымаючы марку, “Дудуткі” не адмовілі ў магчымасці павучыцца ганчарскай справе, ткацтву і проста парадаваць родных сувенірамі.

Чакаючы выступлення “Крамбамбулі”, фанаты адпачывалі на стозе.

Але нядоўга. Наляцеўшы, як стая вераб’ёў, дзятва ўшчэнт раскідала стог па полі — гэтую б энергію ды ў мірнае рэчышча.

Нарэшце такая падстава з’явілася. Доўгачаканая “Крамбамбуля” зноў не расчаравала. Фанаты розных пакаленняў танчылі і падпявалі разам з Вольскім, разрываючы паветра гучным “Жыве Беларусь!”.

Нягледзячы на халоднае надвор’е, каля сцэны было сапраўды горача.

Ніхто і чуць не хацеў пра заканчэнне канцэрту. Вольскі ўжо сышоў, а фанаты ўсё не разыходзіліся.

— Ну калі тут усе засталіся, дык давайце паклічам і Дзеда Мароза! — прапанаваў адзін з музыкаў.

— Ля-вон! Ля-вон! — грымнуў натоўп.

Адмовіць фанатам “Дзядуля Лявон” не змог.

“Раскруціўшы” Вольскага яшчэ на некалькі песень, усе разыходзілся, напяваючы апошнія “Тры чарапахі” і скандуючы “Жыве Беларусь!”.