Клічко супраць Лукашэнкі
17 лютага адбыліся суды над ўдзельнікамі акцыі салідарнасці, якая прайшла напярэдадні ў цэнтры сталіцы. Сярод іх — актывісты моладзевых рухаў Барыс Гарэцкі, Алег Корбан, Павел Фігурын і Алег Мяцеліца.
Паводле рашэння
Партызанскага раённага суда, Алег Мяцеліца будзе адбываць 15 сутак арышту ў
спецпрыёмніку-размеркавальніку на вул.Акрэсціна. Варта адзначыць, што падчас
судовага пасяджэння суддзя Ала Дземінская адмовіла адвакату ў хадайніцтвах аб
увядзенні ў справу іншых сведкаў, акрамя супрацоўнікаў міліцыі, а таксама
прыняць да разгляду відэазапіс затрымання Мяцеліцы. Трох іншых ўдзельнікаў
акцыі — Алега Корбана, Паўла Фігурына і Барыса Гарэцкага — суд Цэнтральнага
раёна пакараў 10 суткамі зняволення.
Нагадаем, што
ўчора некалькі соцень чалавек выйшлі на вуліцы Мінска, Віцебска, Магілёва, каб
выказаць сваю салідарнасць з сем’ямі палітвязняў і зніклых апазіцыйных
палітыкаў і журналістаў. Усе акцыі былі жорстка разагнаныя супрацоўнікамі
міліцыі. Паводле сведкаў, падчас разгону пікету ў Мінску міліцыянты дзейнічалі
досыць груба: яны штурхалі людзей на лёд, білі ў спіны і па нагах, з вуснаў
некаторых ахоўнікаў правапарадку здзекліва гучалі нямецкія словы: "Я-я,
шнэль-шнэль".
Падчас пікету
супрацоўнікі міліцыі затрымалі 24 чалавекі, сярод якіх былі і непаўнагадовыя.
Некалькі гадзін затрыманыя правялі ў РУУС Цэнтральнага і Ленінскага раёнаў.
Усе, акрамя Алега Мяцеліцы, Алега Корбана, Паўла Фігурына і Барыса Гарэцкага,
якім было прад’яўлена абвінавачванне ў хуліганстве, былі адпушчаныя на волю.
Хваля
салідарнасці з беларусамі пракацілася па ўсёй Еўропе. У Польшчы, Чэхіі,
Украіны, Германіі, ЗША, Канады, Нідэрландах, Велікабрытаніі, Швецыі, Нарвегіі і
іншых краінах свету людзі выходзілі да беларускіх амбасад, а таксама на плошчы
гарадоў, каб выказаць сваю падтрымку з усімі, хто змагаецца за свабоду і
дэмакратыю Беларусі.
Сваю падтрымку
беларусам выказаў чэмпіён свету па боксе, лідэр Украінскага Грамадзянскага
блока “ПОРА-ПРП” Віталь Клічко. 16 лютага ён выступіў з заявай салідарнасці з
беларускімі дэмакратычнымі сіламі, а таксама выказаў пратэст супраць масавых
арыштаў беларускай моладзі напярэдадні прэзідэнцкіх выбараў. “Я далучаю свой
голас да галасоў соцень і тысяч грамадзян ў многіх краінах свету, якія заклікаюць
да свабоды і дэмакратыі ў вашай краіне, у брацкай Беларусі”, — гаворыцца ў
заяве Віталя Клічко, якая прыйшла на адрас прэс-цэнтра Хартыі’97. “Я таксама
заклікаю беларускія ўлады спыніць масавыя арышты моладзі з апазіцыйных рухаў,
такіх жа грамадзян Беларусі, якія маюць права на ўласны пункт погляду, права на
свой уласны выбар. Такія дзеянні не робяць гонару ўладам, бо перамога па-за
правіламі каштуе няшмат”, — зазначыў ён.
Оцените статью
1 2 3 4 5Читайте еще
Избранное