Карбалевіч: Лукашэнка хацеў утаіць той факт, што дамагаўся вайсковай падтрымкі Расеі

Палітолаг на Радыё Свабода разважае пра першае рэха візыту Лаўрова.

— Аляксандар Лукашэнка падчас наведваньня лякарні № 6 заявіў, што ніколі не прасіў расейскае кіраўніцтва аб дапамозе. Паводле яго, Уладзімір Пуцін, даведаўшыся пра падзеі ў Беларусі, сам прапанаваў падставіць плячо, — піша Валер Карбалевіч. — Па-першае, гэта няпраўда. Пасьля 9 жніўня Лукашэнка шмат разоў публічна прасіў Маскву аб расейскай вайсковай дапамозе супраць вонкавай агрэсіі, казаў пра пагрозу Беларусі з тэрыторыі Польшчы і Літвы.

А вось той факт, што ён дамагаўся вайсковай падтрымкі Расеі, каб абараніць сябе ад народу, хацеў утаіць. Мусіць, трохі саромеўся.

Але Пуцін выдаў усе тайны. 27 жніўня прэзыдэнт РФ у інтэрвію тэлежурналісту Сяргею Брылёву на канале «Россия-1» заявіў: «Аляксандар Рыгоравіч папрасіў мяне сфармаваць пэўную рэзэрву з супрацоўнікаў праваахоўных органаў. І я гэта зрабіў. Але мы дамовіліся таксама, што яна ня будзе выкарыстаная да таго часу, пакуль сытуацыя ня будзе выходзіць з-пад кантролю», — сказаў Пуцін.

Наступным днём 28 жніўня Лукашэнка зь вялікім задавальненьнем вітаў гэтую рэпліку Пуціна: «Вы ўчора чулі заяву нашага суседа і майго добрага сябра. Гэта ж не таму, што расейцы хочуць абараніць Беларусь. Слухайце, самі абаронімся. Але мы з прэзыдэнтам Расеі разумеем, што можа быць, калі мы праваронім».

І можна меркаваць, што Лаўроў нагадаў Лукашэнку пра той эпізод. Маўляў, калі вы апынуліся ў крытычнай сытуацыі, маглі страціць уладу, то малілі Пуціна дапамагчы вайсковымі фармаваньнямі. А цяпер адмаўляецеся ад тых абяцаньняў, якія давалі прэзыдэнту Расеі ў Сочы.

Дык вось цяпер Лукашэнка адказаў. Амаль словамі гераіні вядомага савецкага фільму: «Невінаватая я, ён сам прыйшоў».

Атрымліваецца, што Лукашэнка выкрыў увесь непрывабны твар расейскага імпэрыялізму, які, карыстаючыся часовымі цяжкасьцямі найбліжэйшага саюзьніка, працягнуў сваю вайсковую лапу да сьвятой беларускай землі.

А Лукашэнка зноў выступае як абаронца сувэрэнітэту Беларусі. Мастацтва пераабуваньня ў паветры, даведзенае да віртуознасьці.

Класковский: «Простор для маневра у Лукашенко сужается»

Оцените статью

1 2 3 4 5

Средний балл 4.7(79)