«Камала можа перамагчы»

– Паглядзеў учора адзін з першых перадвыбарчых выступаў Камалы Харыс, – піша Цыганкоў. – Упершыню за апошнія гады бачыў у прысутных прыхільнікаў Дэмакратаў такі непадробны энтузіязм.

Яна была вельмі «глядзібельна» – вясёлая, сьмялася (ну гэта ўжо яе фірмовая фішка, відаць), адрывалася ад тэксту, адказвала на рэплікі з аўдыторыі, заражала сваімі эмоцыямі.

Калі праводзіць (знаёмыя нам) гістарычныя аналогіі, то яе кантраст з позьнім Байдэнам выглядаў як Гарбачоў на фоне Брэжнева ці Чарненкі.

Калі ўлічыць, што амэрыканская прэса (якая на працэнтаў 80 за Дэмакратаў) будзе яе ўсхваляць і ўстрымаецца ад сур'ёзнай крытыкі «дзеля перамогі над Трампам», калі ведаць, што за яе падключацца ўсе зоркі Галівуду і шоў-бізнэса, калі разумець, што яна мае відавочную перавагу сярод моладзі, а прывесьці моладзь на выбары – гэта галоўная задача Дэмакратаў, якая не вырашалася з кандыдатам Байдэнам, калі ўлічыць, што Трамп узяў сабе ў віцэ-прэзыдэнты ідэйна такога ж як ён (а значыць, ніяк не пашырыў свой электарат)…

І нават калі ўзгадаць гістарычны досьвед, паводле якога віцэ-прэзыдэнты даволі часта станавіліся прэзыдэнтамі (Труман, Ніксан, Форд, Буш, Байдэн), то мы прыходзім да такой высновы:

Камала можа перамагчы.