«Еўрарадыё»: Што мы будзем рабіць далей

Улады закрываюць карпункт «Еўрарадыё». Рэдакцыя апублікавала ліст, у якім патлумачыла, што будзе рабіць далей. 

– Закрыццё карпункта @euroradio у Беларусі — гэта, найхутчэй, адна з частак адказу беларускіх уладаў на санкцыі з боку Еўрасаюза. Мы афіцыйна працавалі ў Мінску 11 гадоў. Тое, што ўрад закрывае карпункт менавіта цяпер, пасля ўвядзення «чацвёртага пакета» і сектаральных санкцый, гэта наўрад ці супадзенне.

Вядома, гэта паўплывае на нашу працу. Але не спыніць нас. З лета не працуе наш сайт euroradio.fm, з восені нашы карэспандэнты не могуць атрымаць у МЗС акрэдытацыі. Але мы працягвалі працаваць. І закрыццё карпункта прынцыпова сітуацыю не змяняе.

Мы чакалі такога павароту падзеяў і рыхтаваліся. Не можам сказаць, што былі да канца гатовыя, але план ёсць, і не адзін.

Натуральна, вельмі шкада, што гэта адбываецца. Не будзем геройстваваць і казаць, што Еўрарадыё сыходзіць у партызаны. Але ў нас ёсць офіс у Варшаве, які беларускія ўлады закрыць не могуць.

Нішто не мусіць стаяць паміж беларусамі і праўдай. Мы разам! Жыве Беларусь!