Дазволіў фоткацца з гарадавым. Што змяніў Юрый Караеў за месяц кіраўніцтва МУС

Роўна месяц таму, 11 чэрвеня, Юрый Караеў быў прызначаны міністрам унутраных спраў. Ён змяніў на гэтай пасадзе адыёзнага Ігара Шуневіча, які запомніўся многім сваімі неадназначнымі словамі і ўчынкамі. Ці атрымалася Караеву нешта змяніць у працы МУС за гэтыя трыццаць дзён?

Міністэрства стала больш адкрытым

Першае, што заўважылі літаральна ўсе, — гэта змена працы ў медыйным кірунку. Калі пры Шуневічу МУС было ледзьве не больш закрытай структурай, чым КДБ, то цяпер падыходы пачынаюць мяняцца.

Звернем увагу, што прэс-сакратар МУС Вольга Чамаданава завяла тэлеграм-канал, дзе аператыўна інфармуе пра здарэнні і крымінальныя навіны. Напрыклад, у сітуацыі з самагубствам вясковага дэбашыра ў міліцэйскай машыне менавіта структуры МУС самі распраўсюдзілі навіну, а не сталі захоўваць маўчанне па старой памяці. Калі бачна, што сілавікі нічога не хаваюць і гатовыя самі расказваць, расце і давер да міліцыі.

І гэта не адзінкавы падобны выпадак. Такія стандарты працы былі зададзеныя ад першага дня Караева на пасадзе. Калі ў Баранавічах памёр салдат унутраных войскаў МУС, прэс-сакратар Уладзімір Пархамцаў сказаў «НН», што на апублічванне здарэння была асабістая воля міністра. Паглядзім, што будзе далей.

Дазволіў фоткацца з гарадавым

Здаецца, у Караева няма ніякага пункціка наконт помніка царскаму гарадавому, як тое было ў ягонага папярэдніка. Для Шуневіча гарадавы набыў сакральны характар. І любы жарт з гарадавога ўспрымаўся міліцыяй вельмі рэзка.

Чаго варты вядомы выпадак з 16-гадовым падлеткам Арсенем, які даў помніку поўху. Міліцыянеры не проста злавілі хлопца, але і на камеру прымусілі прасіць прабачэнне ў кавалка металу. У інтэрнэце пісалі, што гэта ўжо амаль як у Чачні. А міністр Шуневіч заявіў, што гэта была асабіста ягоная ідэя. 18-гадовай студэнтцы Аляксандры пашанцавала яшчэ меней: яна двое сутак правяла ў ізалятары за паднятую на помнік нагу.

Юрый Караеў сказаў, што з помнікам можна фоткацца. «Можна рабіць усё, што не абражае чалавечую годнасць», — запэўніў міністр. Пакуль ніякіх выпадкаў затрыманняў людзей за інцыдэнты з гарадавым пры Караеве не было.

Прыняў «Маці 328»

Ужо ў першы месяц працы Караеў сустрэўся з лідаркай руху «Маці 328» Ларысай Жыхар. Гэта аб’яднанне маці, якія змагаюцца за тое, каб іх дзецям, асуджаным па наркатычных артыкулах, зменшылі тэрміны адбывання пакарання.

Пасля сустрэчы спадарыня Жыхар заявіла, што ў Юрыя Караева існуе жаданне дэталёва разабрацца ў сітуацыі. «Маці я ніколі не адмаўляю», — перадала яна словы міністра.

Што ж паабяцаў Караеў? У прыватнасці, павялічыць час спатканняў для сваякоў асуджаных, а таксама разбіць перадачы ў калонію на некалькі. Паабяцаў міністр унікнуць і ў пытанне «зялёных нашывак», якія носяць у зняволенні асуджаныя па 328-м артыкуле. У найбліжэйшы час будзе зразумела, што з гэтага будзе выканана.

Пазітыўны імідж на Еўрапейскіх гульнях

У самым пачатку гульняў Караеў адзначыў, што міліцыя паўстане перад гасцямі «ветлівай і карэктнай». У выніку, хай турыстаў прыехала не так шмат, нараканняў на працу міліцыі не было, хутчэй наадварот.

Напрыклад, турыстка са Славакіі забылася ў аўтобусе мабільнік. У выніку міліцыя вельмі хутка знайшла дзяўчыну і вярнула ёй тэлефон. Тое самае тычыцца турысткі з Украіны, якая на спаборніцтвах па боксе «пасеяла» кашалёк. І тут міліцыя прыйшла на дапамогу.

А вось нейкіх выпадкаў са знакам мінус з удзелам міліцыі на Еўрапейскіх гульнях, на шчасце, зафіксавана не было.

Ходзіць у цывільным касцюме, а не ў форме

Дбае міністр і пра свой уласны імідж. Напрыклад, часцей за ўсё на людзях ён з’яўляецца не ў форме, а ў цывільным. Так ён прыходзіў, напрыклад, у парламент. Шуневіч аддаваў перавагу выключна форме.

Без формы сфоткалі міністра, калі Караеў выходзіў з будынка МУС і ішоў у бок стадыёна «Дынама». Міністр быў абсалютна адзін і без аховы. Еўрапейскі падыход.

Тэлеграм-канал «Кульгавы д’ябал» зазначае, што знаёмства з калектывам міністэрства Караеў пачаў не з таго, што ўсіх склікаў у сваім кабінеце, а сам прайшоўся па кабінетах падначаленых, каб лепш з імі пазнаёміцца.