Да Статкевіча падсажвалі чалавека, які зьбіваў вязьняў

Марына Адамовіч атрымала 16 лютага ад Мікалая Статкевіча ліст з магілёўскай турмы, у якім палітвязень піша пра чарговую правакацыю супраць яго.

«Першага чысла, як я зразумела, яму паспрабавалі падсадзіць новага суседа, які сам былы супрацоўнік міліцыі. І на яго там шмат скаргаў ад іншых сукамэрнікаў, што ён іх зьбіваў. «Але чалавек той тут доўга не затрымаўся, хутка разабраўся ў сытуацыі, папрасіў прабачэньня за памылку і стаў прасіцца выйсьці».

А самы ключавы сказ, які сапраўды мяне напружыў, гэта вось такі: «Я не пісаў бы табе пра гэты выпадак, бо я ж не пра ўсе такія выпадкі паведамляю. Але мне тут ужо сказалі, што паводле гэтага выпадку, як начальнік выйдзе з адпачынку, будуць разьбіральніцтвы. Калі мяне прызнаюць вінаватым ва „ўціску“ яшчэ і на гэтага чалавека, то з улікам яго памераў і спэцпадрыхтоўкі, я, мабыць, ужо монстар нейкі».

Марына Адамовіч нагадала, што раней да Мікалая Статкевіча ў камэру падсажвалі вязьня, зь якім узьнік канфлікт, і гэта адбілася на становішчы Статкевіча. Марына Адамовіч не выключае новых правакацый супраць яе мужа з-за таго, што ён адмаўляецца падпісваць прашэньне аб памілаваньні на імя Аляксандра Лукашэнкі.

«Пра сябе Мікола напісаў, што пачуваецца добра. Цяпер яму шмат ідзе лістоў, ў тым ліку адказаў на ягоныя лісты. Даслала адказ Ірына Халіп, якая паведаміла, што толькі зараз атрымала ад яго віншаваньне з Новым годам, датаванае яшчэ 23 сьнежня».

Былы кандыдат на прэзыдэнта Мікалай Статкевіч асуджаны на 6 гадоў зьняволеньня за арганізацыю мітынгу пратэсту супраць фальшаваньня вынікаў прэзыдэнцкіх выбараў 19 сьнежня 2010 году. Палітык абывае пакараньне ў магілёўскай турме, куды быў зьмешчаны як злосны парушальнік рэжыму.