Цытата дня: «Калі б у нас былі свабодныя выбары — Макей бы мог у іх удзельнічаць, і магчыма, нават перамагчы»

Францішак Вячорка тлумачыць, чаму Макей ня Тоні Старк, і ім ня стане.

Уладзімір Макей, фота Вольга Шукайла, TUT.BY

—  Усім хочацца верыць у супэргерояў і справядлівую добрую сілу, якая, як Тоні Старк, уздымецца і выратуе нас ад злога. І сапраўды, на фоне іншых безаблічных чыноўнікаў-тэхнакратаў Макей выглядае амаль беларускім Зянонам, — напісаў Францішак Вячорка.

Мой слых таксама лашчаць ягоныя заявы пра беларускую мову і вышыванкі, што я амаль усё гатовы яму прабачыць. Яго любяць і заходнія палітыкі, дыпляматы — на кантрасьце з Лукашэнкам гэты выглядае божым адуванчыкам. Нават больш, калі б у нас былі свабодныя выбары — Макей бы мог у іх удзельнічаць, і магчыма, нават перамагчы.

Але Макей ня Тоні Старк, і ім ня стане.

Макей ня будзе ўдзельнічаць у выбарах, і дакладна ня пойдзе супраць сыстэмы, як бы многім тое ні мроілася. Ён вырас з гэтай сыстэмай і ў рэжыме. Ён прафэсійны функцыянэр і выдатны дыплямат з трывіяльнай задачай: адбельваць рэжым любой цаной. Ён не самастойны палітык, і не харызматычны лідэр.

Наўрад ці Лукашэнка перадасьць уладу Макею. Я ўвогуле сумняюся, што Лукашэнка зьбіраецца перадаваць камусьці ўладу насуперак распаўсюджанаму меркаваньню.

Макей — мэдыйная фігура, і надзвычай уплывовы на Захадзе, але абсалютна не ўплывае на палітыку ў Беларусі. Было шмат кейсаў, калі Макею даводзілася апраўдвацца перад заходнімі дыпляматамі за чарговы разгон плошчы. Хаця, будучы кіраўніком адміністрацыі прэзыдэнта падчас падзеяў Плошчы 2010 году, ён таксама, здаецца, мала на што ўплываў. Зрабіў пару заяваў пра тое, што апазыцыйныя экстрэмісты рыхтуюць выбухоўкі, на гэтым яго роля скончылася.

У дзяржаўных структурах, упэўнены, мноства людзей, якія ціха сымпатызуюць беларускай справе, дэмакратычнаму руху, бачаць Беларусь у Эўропе. І ў крытычны момант, як гісторыя паказвае, такія людзі бяруць на сябе ініцыятыву, прымаюць лёсавызначальныя рашэньні, каб павярнуць краіну ў бок дэмакратыі.

Але не разьлічвайце асабліва на Макея, іначай бы ён папросту не займаў міністэрскую пасаду пры гэтым рэжыме.

Оцени статью:
1
2
3
4
5
Средний балл - 3.6 (оценок:45)